பாட்மிண்டன் தரவரிசையில் சாட்விக் - ஷிராக் ஜோடிக்கு 3-வது இடம்

புதுடெல்லி: சர்வதேச பாட்மிண்டன் தரவரிசை பட்டியல் வெளியிடப்பட்டுள்ளது. இதில் சமீபத்தில் ஆயிரம்புள்ளிகள் கொண்ட இந்தோனேஷியா ஓபன் தொடரில் ஆடவர் இரட்டையர் பிரிவில் சாம்பியன் பட்டம் வென்ற இந்தியாவின் சாட்விக் சாய்ராஜ் ராங்கி ரெட்டி, ஷிராக் ஷெட்டி ஜோடி 3-வது இடத்துக்கு முன்னேறி உள்ளது.

காமன்வெல்த் விளையாட்டில் தங்கப் பதக்கம் வென்றுள்ள சாட்விக் -ஷிராக் ஜோடியானது இந்தோனேஷியா ஓபன் தொடரின் இறுதி ஆட்டத்தில் உலக சாம்பியனான மலேசியாவின் ஆரோன் சியா, சோ வூய் யிக் ஜோடியை நேர் செட்டில் வீழ்த்தி இருந்தது. இதன் மூலம் ஆயிரம் புள்ளிகள் கொண்ட தொடரின் இரட்டையர் பிரிவில் சாம்பியன் பட்டம் வென்ற முதல் இந்திய ஜோடி என்ற சாதனையையும் சாட்விக், ஷிராக் ஆகியோர் படைத்திருந்தனர்.

ஆடவர் ஒற்றையர் பிரிவு தரவரிசையில் இந்தியாவின் கிடாம்பி காந்த் 3 இடங்கள் முன்னேறி 19-வது இடத்தை பிடித்துள்ளார். லக் ஷயா சென் இரு இடங்கள் முன்னேற்றம் கண்டு 18-வது இடத்தை அடைந்துள்ளார். இந்தோனேஷியா ஓபன் தொடரில் அரை இறுதியில் தோல்வியை சந்தித்த ஹெச்.எஸ்.பிரனோய் 9-வது இடத்தில் தொடர்கிறார். வளர்ந்து வரும் வீரரான பிரியன்ஷு ரஜாவத் 4 இடங்கள் முன்னேறி 30-வது இடத்தை பிடித்துள்ளார்.

மகளிர் ஒற்றையர் பிரிவு தரவரிசையில் இந்தியாவின் பி.வி.சிந்து இரு இடங்கள் முன்னேறி 12-வது இடத்தையும், சாய்னா நெவால் ஓர் இடம் முன்னேறி31-வது இடத்தையும் பிடித்துள்ளனர். மகளிர் இரட்டையர் பிரிவில் ட்ரீசா ஜாலி, காயத்ரி கோபிசந்த் ஜோடி 16-வது இடத்தில் தொடர்கிறது.