திருமலை: திருப்பதி ஏழுமலையான் கோயில் பிரம்மோற்சவ விழா கடந்த 15-ம் தேதி மாலை கொடியேற்றத்துடன் தொடங்கியது. 8-ம் நாளான நேற்று காலை 8 மணிக்கு தேரோட்டம் தொடங்கியது.
தேவஸ்தான நிர்வாக அதிகாரி எம்.ரவிசந்திரா, கூடுதல் நிர்வாக அதிகாரி வெங்கய்ய நாயுடு உட்பட திரளான பக்தர்கள் தேரை இழுத்தனர். மாட வீதிகளில் ஏழுமலையானின் தேர் கம்பீரமாக உலா வந்தது. வழி நெடுகிலும் திரளான பக்தர்கள் தேரின் மீது மிளகு, உப்பு போன்றவற்றை தூவி நேர்த்திக்கடன் செலுத்தினர்.
சுமார் 3 மணி நேரம் வரை தேரோட்டம் வெகு சிறப்பாக ‘கோவிந்தா... கோவிந்தா’ எனும் கோஷத்துடன் நடைபெற்றது. குதிரை வாகன சேவை நேற்றிரவு குதிரை வாகனத்தில் கல்கி அலங்காரத்தில் மலையப்பர் எழுந்தருளி பக்தர்களுக்கு அருள் பாலித்தார்.
அப்போது மாட வீதிகளில் திரண்டிருந்த பக்தர்கள் ஆரத்தி எடுத்து வழிபட்டனர். மேலும் நடன கலைஞர்களின் நடன நிகழ்ச்சிகளும் அனைவரையும் கவர்ந்தன. குதிரை வாகனம் பிரம்மோற்சவத்தின் கடைசி வாகன சேவையாகும். இதில் ஜீயர்கள், தேவஸ்தான உயர் அதிகாரிகள், பக்தர்கள் கலந்து கொண்டு சிறப்பித்தனர்.
சக்கர ஸ்நானத்துடன் நிறைவு வருடாந்திர பிரம்மோற்சவ விழாவின் நிறைவு நாளான இன்று காலை 6 மணி முதல் 9 மணி வரை திருமலையில் ஏழுமலையானின் கோயில் அருகே உள்ள வராக சுவாமி திருக்கோயில் தெப்பக்குளத்தில் சக்கர ஸ்நான நிகழ்ச்சி நடைபெற உள்ளது.
ஸ்ரீதேவி, பூதேவி சமேதராய் மலையப்பரும், சக்கரத்தாழ்வாரும் கோயிலில் இருந்து ஊர்வலமாக தெப்பக் குளக்கரைக்கு கொண்டு வரப்படுவர்.
அங்கு சிறப்பு திருமஞ்சன நிகழ்ச்சிகள் நடந்த பின்னர், சக்கரத்தாழ்வார் தீர்த்தவாரி நடைபெறும். அப்போது அந்த நொடிக்காக காத்திருக்கும் திரளான பக்தர்கள் குளத்தில் இறங்கி புனித நீராடுவர். இந்நிகழ்ச்சியை தொடர்ந்து இன்று மாலை கொடி இறக்க நிகழ்ச்சி நடைபெற்று பிரம்மோற்சவம் நிறைவுறும்.
