குமுளி: சபரிமலையில் மண்டல பூஜை நவ.17-ம் தேதி தொடங்கவுள்ள நிலையில், புதிய மேல்சாந்திகள் தேர்வு வரும் 18-ம் தேதி நடைபெற உள்ளது. இதில் தேர்வு செய்யப்படுபவர்கள் மண்டல கால வழிபாடுகளில் இருந்து பூஜைகளை தொடர்ந்து மேற்கொள்வர்.
கேரளம் மாநிலம் சபரிமலையில் இந்த ஆண்டு மண்டல பூஜை காலம் நவ.17-ல் தொடங்க உள்ளதால் புதிய மேல்சாந்திகளுக்கான முதல்கட்ட தேர்வு முடிந்துள்ளது. இதில் 5 பேர் சந்நிதானத்துக்கும், 3 பேர் மாளிகைபுரத்துக்கும் பரிந்துரைக்கப்பட்டுள்ளனர். இந்நிலையில் துலாம் (ஐப்பசி) மாத வழிபாட்டுக்காக வரும் 17-ம் தேதி மாலை கோயில் நடை திறக்கப்பட உள்ளது.
இதைத் தொடர்ந்து, மறுநாள் காலை நேர வழிபாட்டுக்குப் பிறகு மேல்சாந்திகளின் இறுதிக்கட்ட தேர்வு நடைபெற உள்ளது. முதல்கட்ட தேர்வில் தேர்வானவர்களின் பெயர்கள் சீட்டுகளில் எழுதப்பட்டு, அவற்றை குடங்களில் இட்டு குடவோலை முறையில் பந்தள வம்ச குழந்தைகள் புதிய மேல்சாந்தியை தேர்வு செய்வர். தேர்வு செய்யப்படும் புதிய மேல்சாந்திகள் கார்த்திகை முதல் தேதியில் இருந்து வழிபாடுகளை மேற்கொள்வர்.
சபரிமலையில் மண்டல, மகர விளக்கு வழிபாடுகளுக்கு தினமும் பல்லாயிரக்கணக்கான பக்தர்கள் வருவார்கள் என்பதால் அதற்கான முன்னேற்பாடுகளை தேவசம் போர்டு நிர்வாகிகள் மேற்கொண்டு வருகின்றனர். இருப்பினும், இப்பணி முழு வீச்சில் நடைபெறவில்லை என புகார் எழுந்துள்ளது.
கடந்த ஆண்டுகளில் மண்டல, மகர விளக்கு பூஜைகளின்போது அதிக குளறுபடிகள் ஏற்பட்டன. வனப்பாதையில் வருபவர்களுக்கு சிறப்பு தரிசனம், தினமும் அன்னதான விருந்து, நெரிசலற்ற தரிசனம், அடிப்படை வசதிகள் போன்றவற்றில் குளறுபடி ஏற்பட்டது. இதனால் பக்தர்கள் மனம் சஞ்சலப்படும் நிலை உருவானது. இந்த ஆண்டும் முறையான திட்டமிடல்களை தேவசம் போர்டு இதுவரை தொடங்கவில்லை.
இதனால் கூட்ட மேலாண்மை, தரிசனத்தை ஒழுங்குபடுத்துதல் போன்றவை கேள்விக்குறியாகவே உள்ளது. இதுகுறித்து தேனி வீரபாண்டியயை சேர்ந்த ஐயப்ப பக்தர் மணிகண்டன் உள்ளிட்ட சிலர் கூறும்போது, “சபரிமலையில் பக்தர்களை கட்டுக்கடங்காமல் அனுமதிப்பதே பல்வேறு பிரச்சினைகளுக்கும் காரணம். நிர்ணயிக்கப்பட்ட எண்ணிக்கையில் முன்பதிவு மூலம் அனுமதித்தால் நெரிசலற்ற தரிசனம், உணவு, சுகாதாரம், தங்குதல் உள்ளிட்ட அனைத்து வசதிகளும் நிறைவாக இருக்கும்” என்றனர்.
