மார்ச் 11-ம் தேதி சென்னையில் முற்றுகை போராட்டம்: வைகோ

காவிரி ஆற்றின் குறுக்கே கர்நாடக அரசு அணை கட்டுவதற்கு எதிர்ப்பு தெரிவிக்கும் வகையில் காவிரிப் பாதுகாப்பு இயக்கம் சார்பில் வரும் 11-ம் தேதி சென்னையில் சுங்க அலுவலகத்தை முற்றுகையிடும் போராட்டம் நடைபெறும் என்று மதிமுக பொதுச்செயலாளர் வைகோ தெரிவித்தார்.

மதிமுக மாவட்ட நிர்வாகிகள் ஆலோசனைக் கூட்டம் மதுரையில் நேற்று நடைபெற்றது.

இதில் கலந்து கொள்ள வந்த அவர் செய்தியாளர்களிடம் கூறியது: நியூட்ரினோ எதிர்ப்பு இயக்கம் சார்பில் வரும் 17-ம் தேதி தேனியில் விழிப்புணர்வு ஊர்வலமும், 18-ம் தேதி மதுரையில் உண்ணாவிரதப் போராட்டமும் நடத்த உள்ளோம்.

காவிரி ஆற்றின் குறுக்கே கர்நாடக அரசு அணை கட்டுவதால் தமிழகத்துக்கு கடும் பாதிப்பு ஏற்படும். இதற்கு எதிர்ப்பு தெரிவித்து காவிரிப் பாதுகாப்பு இயக்கம் சார்பில் வரும் 11-ம் தேதி சென்னையில் சுங்க அலுவலகத்தை முற்றுகையிடும் போராட்டம் நடைபெற உள்ளது.

இலங்கையில் தமிழர் பகுதிகளில் உள்ள ராணுவத்தை வெளியேற்ற வேண்டும். அதேபோல, தமிழர் நிலங்களை அவர்களிடமே ஒப்படைக்க வேண்டும் என்றார்.