இந்தியாவின் முதல் பெண் மருத்துவர் முத்துலட்சுமி ரெட்டிக்கு டூடுல் வெளியிட்டு கவுரவித்த கூகுள்

இந்தியாவின் முதல் பெண் மருத்துவரான முத்துலட்சுமி ரெட்டிக்கு டூடுல் வெளியிட்டு கவுரவித்துள்ளது கூகுள் நிறுவனம்.

தமிழகத்தில் பிறந்த மருத்துவர் முத்துலட்சுமி ரெட்டிக்கு இன்று 133-வது பிறந்த நாள். அதை நினைவுகூரும் வகையில் கூகுள் டூடுல் வெளியிடப்பட்டுள்ளது.

முத்துலட்சுமி ரெட்டியின் பிறந்தநாளை ஆண்டுதோறும் 'மருத்துவமனை தினமாகக்' கடைபிடிக்கப்படும் என தமிழக அரசு அறிவித்திருப்பது குறிப்பிடத்தக்கது.

முத்துலட்சுமி ரெட்டியின் வரலாறு:
முத்துலட்சுமி ரெட்டி, புதுக்கோட்டை மாவட்டத்தில் 1886-ம் ஆண்டு பிறந்தார். பெண் கல்வி எதிர்ப்புகளை சமாளித்து கல்வி கற்றவர். மெட்ராஸ் மருத்துவக் கல்லூரியில் அறுவை சிகிச்சையியல் துறையில் இந்திய அளவிலேயே இணைந்த முதல் பெண் மாணவி என்ற பெருமையைப் பெற்றவர். 1

912-ல் இந்தியாவின் முதல் பெண் மருத்துவரானார். அதே ஆண்டு சென்னை மகப்பேறு மருத்துவமனையின் முதல் பெண் மருத்துவராக இணைந்தார். 

1918-ல் வுமன்ஸ் இந்தியா அசோஷியேசனை நிறுவினார்.  1925-ம் ஆண்டு சட்ட மேலவை துணைத்தலைவராக போட்டியின்றி தேர்ந்தெடுக்கப்பட்டார். 

தேவதாசி முறை ஒழிப்பு, இருதார தடைச்சட்டம், பெண்களுக்கான சொத்துரிமை வழங்கும் சட்டம், பால்ய விவாக தடைச்சட்டம் போன்ற சட்டங்களை நிறைவேற்ற பாடுபட்டார். 

1954-ல் அடையாறு புற்றுநோய் சிகிச்சை மையம் நிறுவப்பட்டது. தென்னிந்தியாவில் முதல் புற்றுநோய் சிகிச்சை மையம் அமைத்த பெருமை இவரையே சேரும். 1956-ம் ஆண்டு மத்திய அரசு இவருக்கு பத்மபூஷண் விருது வழங்கி கவுரவித்தது. 1968-ம் ஆண்டு தனது 81-வது வயதில் அவர் இயற்கை எய்தினார்.

இன்றைய டூடுலை வடிவமைத்தவர் பெங்களூருவைச் சேர்ந்த ஓவியர் அர்ச்சனா ஸ்ரீநிவாசன். இது, மருத்துவர் முத்துலட்சுமி ரெட்டி பெண்கள், சிறுமிகளுக்கு வழிகாட்டுவது போல் வடிவமைகப்பட்டுள்ளது.