தென்னிந்திய திரையுலகில் 6 புதிய தொடர்களை அறிவித்துள்ளது நெட்ஃப்ளிக்ஸ் ஓடிடி நிறுவனம்.
முன்னணி ஓடிடி நிறுவனமான நெட்ஃப்ளிக்ஸ் பல்வேறு மொழிகளில் புதிய தொடர்கள், படங்கள் என தயாரித்து வருகிறது. ஆனால், தென்னிந்திய திரையுலகில் பெரிதாக எதையும் தொடங்காமல் இருந்தது. தற்போது அங்கும் 6 புதிய தொடர்களை தயாரித்து வருவதாக அறிவித்துள்ளது.
அத்தொடர்கள் பின்வருமாறு:
ஸ்டீபன்: சீட் நுனியில் பார்வையாளர்களை அமர வைக்கும் தமிழ் சைக்காலஜிக்கல் த்ரில்லர். மிதுன் இயக்கும் இந்தப் படத்தில் கோமதி ஷங்கர் நடிக்கிறார். ஒரு வழக்கில் கில்லரை மதிப்பிடும் மனநல மருத்துவரை சுற்றி இந்தக் கதை நகரும். இது எப்படி அந்த மனநல மருத்துவருக்கே எதிராக திரும்பும் என்பதையும் இந்தக் கதை சொல்லும்.
சூப்பர் சுப்பு: இது தெலுங்கில் தொடராக வரவுள்ளது. நகைச்சுவை ததும்ப உருவாகும் வித்தியாசமான இந்தக் கதையை மாலிக் ராம் இயக்க சந்தீப் கிஷன் நடித்துள்ளார். வேலைக்குத் தகுதியற்றவராக இருந்தாலும், ஒரு தொலைதூர கிராமத்தைச் சேர்ந்தவர்களுக்கு பாலியல் கல்வியைக் கற்பிக்கும் பணியில் எதிர்பாராத விதமாக நேரும் அனுபவங்களே கதை.
லவ்: இது தமிழில் உருவாகும் தொடராகும். பாலாஜி மோகன் இயக்கத்தில் அர்ஜுன் தாஸ் மற்றும் ஐஸ்வர்யா லட்சுமி நடிப்பில், நவீன காதல் குறித்த வித்தியாசமான கோணத்தை வழங்குகிறது. எதிர்பாராத வழிகளில் இருவரை நெருக்கமாகக் கொண்டுவரும் தருணத்தில் ஏற்படும் சவால்களை இந்தத் தொடர் பேசுகிறது. நகைச்சுவை மற்றும் இன்றைய காதலையும் தொடர் பேச இருக்கிறது.
மேட் இன் கொரியா: இது தமிழ் சினிமாவிற்கு ஒரு புதிய கலாச்சாரக் கதையைக் கொண்டு வருகிறது. ரா கார்த்திக் இயக்கிய இந்தக் கதையில் 'ஸ்க்விட் கேம்' புகழ் பார்க் ஹை-ஜினுடன் பிரியங்கா மோகன் நடிக்கிறார். துரோகத்தால் கொரியாவுக்கான கனவுப் பயணம் தடம் புரண்ட ஒரு இளம் பெண்ணைப் பற்றி இந்தக் கதை பேசுகிறது. எதிர்பாராத நட்புகள் மற்றும் கடினமான பாடங்கள் மூலம், அவள் நம்பிக்கையையும் தன்னையும் கண்டுபிடிக்கிறாள்.
தக்ஷகுடு: வினோத் அனந்தோஜு இயக்கத்தில் உருவாகியுள்ள தெலுங்கு நாட்டுப்புற த்ரில்லர் கதை. ஆனந்த் தேவரகொண்டா ஒரு பார்வை சவால் கொண்டவராக நடித்திருக்க அவருடன் விஸ்வாசமான ஒரு நாயும் எப்போதும் இருக்கிறது. ஒரு துயரமான விபத்துக்குப் பிறகு தனது சக கிராமவாசிகளின் மரணத்திற்குப் பழிவாங்கப் புறப்படுகிறார் என்பதுதான் கதை.
லெகஸி: இது தமிழ் தொடர். மாதவன், நிமிஷா சஜயன், கௌதம் கார்த்திக், குல்ஷன் தேவையா மற்றும் அபிஷேக் பானர்ஜி ஆகியோர் நடிக்கின்றனர். இந்த குடும்ப கேங்ஸ்டர் நாடகம் வாரிசு உரிமையை மையமாகக் கொண்டு நகர்கிறது.