OTT Pick: மும்பை போலீஸ் - சைக்கலாஜிக்கல் த்ரில்லர் தரும் தனித்துவ அனுபவம்!

ரோஷன் ஆண்ட்ரூஸ் இயக்கத்தில் பிருத்விராஜ், ரஹ்மான் மற்றும் ஜெயசூர்யா ஆகியோர் முக்கிய கதாபாத்திரங்களில் நடித்து வெளியான சைக்கலாஜிக்கல் த்ரில்லர் திரைப்படம்தான் ‘மும்பை போலீஸ்’ (Mumbai Police). படத்தின் வேகத்துக்கு ஏற்ற மிரட்டலான இசையின் மூலம் கவனம் ஈர்த்திருக்கிறார் இசையமைப்பாளர் கோபி சுந்தர்.

கொச்சியின் உதவி காவல் ஆணையர் (ACP) ஆண்டனி மோசஸ் ஒரு பயங்கரமான விபத்தில் சிக்குகிறார். இந்தச் சம்பவத்துக்குப் பிறகு, அவர் தனது நினைவாற்றலில் ஒரு விதமான குழப்பத்தை சந்திக்க நேரிடுகிறது. மும்பை காவல் துறையில் அனுபவமிக்க அவர், உளவியல் தடுமாற்றத்துடன், தீவிரமான வழக்கு ஒன்றை அவர் மீண்டும் விசாரிக்க தொடங்க நேரிடுகிறது. பழைய ஆதாரங்கள், புதிய சாட்சியங்கள், மறைக்கப்பட்ட உண்மைகள் இவை அனைத்தும் ஒன்று சேர்ந்து அவரை எதிர்பாராத ஒரு பாதைக்கு இட்டுச் செல்கிறது.

அவருக்குள் ஏற்பட்ட உளவியல் மாறுபாடுகள், கடந்த கால நினைவுகள், காவல் துறையின் பிரதான ‘கூட்டணி’கள் மற்றும் நம்பிக்கைகள் என எல்லாம் சேர்ந்து இந்தச் சிக்கலான வழக்கின் விசாரணை முடிவில் உண்மை வெளிவந்ததா, இல்லையா என்பதுதான் படத்தின் திரைக்கதை. அதிரடியும் சவால்களும் நிறைந்த இந்தப் பயணம் நீதிக்கான போராட்டம் மட்டுமல்ல, ஒரு மனித மனக்குழப்பத்தின் பேரியக்கமும் கூட. 2013-ல் வெளியான இப்படம் ஜியோ ஹாட்ஸ்டார் ஒடிடி தளத்தில் காணக் கிடைக்கிறது.