வெங்கட்பிரபு இயக்கத்தில் நாக சைதன்யா நடித்த ‘கஸ்டடி’ திரைப்படம் ஜூன் 9-ம் தேதி ஓடிடியில் வெளியாகும் என அதிகாரபூர்வமாக அறிவிக்கப்பட்டுள்ளது.
நாக சைதன்யா, கீர்த்தி ஷெட்டி நடிப்பில் வெளியான படம் ‘கஸ்டடி’. இந்தப் படத்தை வெங்கட்பிரபு இயக்கியுள்ளார். அரவிந்த் சாமி, ப்ரியாமணி, பிரேம்ஜி உள்ளிட்ட பலர் நடித்துள்ள இப்படத்திற்கு இளையராஜா, யுவன்சங்கர் ராஜா இணைந்து இசையமைத்துள்ளனர். கடந்த 2021-ம் ஆண்டு வெங்கட்பிரபுவின் ‘மாநாடு’ ரசிகர்களிடையே பெரும் வரவேற்பை பெற்றது. இதையடுத்து அவரின் ‘மன்மத லீலை’ எதிர்பார்த்த வரவேற்பை பெறாத நிலையில், அடுத்ததாக ‘கஸ்டடி’யை ரசிகர்கள் எதிர்நோக்கியிருந்தனர்.
இந்தப் படம் கடந்த மே 12 திரையரங்குகளில் தமிழ், தெலுங்கில் ஒரே நேரத்தில் வெளியான நிலையில், படம் பார்த்த ரசிகர்கள் கலவையான விமர்சனங்களைத் தெரிவித்தனர். இப்படம் முதல் நாளில் இந்திய அளவில் ரூ.4 கோடி வசூலித்துள்ளதாக கூறப்பட்டது. முதல் வாரத்தில் ரூ.10 கோடியை கூட படம் தாண்டவில்லை.
இந்நிலையில், இப்படம் வரும் ஜூன் 9-ம் தேதி அமேசான் ப்ரைம் ஓடிடி தளத்தில் வெளியாகும் என அதிகாரபூர்வமாக அறிவிக்கப்பட்டுள்ளது.