திருநங்கைகளை மையப் பாத்திரமாகக் கொண்டு முன்னதாகச் சில படங்கள் வெளிவந்திருந்தாலும் ‘டோரதி’ திரைப்படமும், அதன் வெற்றியும் உருவாக்கியிருக்கும் விவாதங்கள் சமூகத் தளத்தில் மிக முக்கியமானவை. கலை, இலக்கியத்தில் அந்த உரையாடல்கள் சற்று முன்னோக்கி நகர்ந்துள்ளன. 2005ஆம் ஆண்டு ரேவதி தொகுத்த ‘உணர்வும் உருவமும்’ தொடங்கி லிவிங் ஸ்மைல் வித்யா, பிரியா பாபு, கல்கி சுப்ரமணியம் உள்ளிட்டோரின் தன்வரலாறுகள், புனைவுகள், கட்டுரைகள் எனப் பல நூல்கள் வெளியாகியிருக்கின்றன. இவை திருநர் இலக்கிய வகைமையின் தொடக்கக்கட்டம் எனலாம்.
இங்கே திருநர் என்பது திருநங்கைகளையும் திருநம்பிகளையும் குறிக்கும் பொதுச் சொல் என்பதையும்; பால்புதுமையினர் என்பது திருநர் உள்பட தன்பால் ஈர்ப்பாளர்கள், இருபால் ஈர்ப்பாளர்கள், பால் ஈர்ப்பு அற்றவர்கள் போன்றோரைச் (LGBTQIA+) சுட்டும் பெயர் என்பதையும்; இவர்களில் திருநங்கைகள் மட்டுமே கலை, இலக்கியம், அரசியல், சமூகம் எனப் பல தளங்களில் பெருமளவில் வெளிப்பட்டிருக்கிறார்கள் என்பதையும் நினைவில் கொள்வோம்.
