அண்மையில் ஆஸ்திரேலிய கிரிக்கெட் வீரர் உஸ்மான் க்வாஜாவின் தன்வரலாற்று நூல் (Sabr: Finding My Way in Cricket and Life) குறித்தும், அதில் 2018ஆம் ஆண்டு நடைபெற்ற தென்ஆப்பிரிக்காவுக்கு எதிரான தொடரில் பந்தைச் சேதப்படுத்திய விவகாரம் பற்றி அவர் எழுதியிருப்பது குறித்தும் பரபரப்பாகப் பேசப்பட்டது. நூல் நவம்பர் மாதம்தான் வெளியாகவிருக்கிறது என்றாலும், சர்ச்சைகள் இப்போதிருந்தே தொடங்கிவிட்டன.
இதுபோன்ற செய்திகளைப் படிக்கும்போது, தமிழில் இந்த நூல் வெளிவருமா, விளையாட்டு வீரர்களின் வரலாற்று நூல்கள் முன்னதாக தமிழில் எத்தனை வெளியாகியிருக்கின்றன என்பன போன்ற கேள்விகளும் இயல்பாகவே எழுவதுண்டு. கிரிக்கெட் நம் பண்பாட்டின் ஓர் அங்கமாகவே மாறிவிட்ட சூழலில், அது குறித்த புத்தகங்களோ, நாட்டின் முதன்மையான கிரிக்கெட் வீரர்களின் வரலாற்று நூல்களோ பரவலாக வெளியாவதில்லை என்பது முரணாக இருக்கிறது.
பிரிட்டிஷ் காலத்திலிருந்தே இந்தியாவில் கிரிக்கெட் விளையாடப்பட்டு வந்தாலும், 1983ஆம் ஆண்டு உலகக் கோப்பையை வென்ற பிறகே கிரிக்கெட் மோகம் பரவியது. தேசப் பக்தியின் அடையாளங்களில் ஒன்றாகவும் மாறிப் போனது. கிரிக்கெட் நுணுக்கங்கள், விதிகள், புள்ளிவிவரங்கள், முக்கிய நிகழ்வுகள் போன்றவை குறித்த பரந்த அறிவு,நம் நாட்டின் பல தரப்பினருக்கு, பல வகைகளில் உண்டு.
கிரிக்கெட் விளையாடாதவர்கள் கூட அதன் மீதுள்ள ஆர்வத்தால் தரவுச் சேகரங்களாக மாறி இருப்பதைப் பார்த்திருப்போம். எடுத்துக்காட்டாக, சச்சின் டெண்டுல்கர் ஒருமுறை சென்னை வந்திருந்தபோது நட்சத்திர உணவகம் ஒன்றின் ஊழியர், முழங்கை காப்புறையால் (Elbow Guard) அவரது ஆட்டம் தடுமாறுகிறது என்று சொன்னது குறித்து சச்சினே பின்னாட்களில் தெரிவித்திருக்கிறார். அப்படியான கிரிக்கெட் தாகம் கொண்டவர்கள்நம் ஆட்கள்.
