இந்த ஆண்டின் தொடக்கத்துடன் வெற்றிகரமான கியூபப் புரட்சியின் 67 ஆண்டுகள் நிறைவடை கின்றன. அப்புரட்சிக்குத் தலைமை வகித்த ஃபிடல் காஸ்ட்ரோவின் நூற்றாண்டு விழாவும் இந்த ஆண்டில் தான் நடக்கவிருக்கிறது.
கியூபாவில் புரட்சிகர அரசு தோற்றுவிக்கப்பட்ட நாள் முதல் அது அமெரிக்காவின் பொருளாதாரத் தடைகளையும் முற்றுகைகளையும் எதிர்கொண்டு வருகிறது. பல வகையான பொருளாதார, ராணுவ உதவிகளை வழங்கிவந்த சோவியத் ஒன்றியம் தகர்ந்தவுடன் கியூப மக்கள் அனுபவித்து வந்த துன்பங்களை எடுத்துரைக்க இக்கட்டுரை போதுமானது அல்ல.
சவால்களும் சாதனைகளும்: அந்தத் துயர ஆண்டுகளில் (1990களில்) கியூப மக்களின் அடிப்படைத் தேவைகளை நிறைவேற்ற, அந்நாட்டு அரசாங்கம் தன் சோசலிசக் கொள்கைகளைச் சற்றுத் தளர்த்த வேண்டிய கட்டாயத்துக்கு உள்ளானது. வெளிநாட்டிலிருந்து வரும் சுற்றுலாப் பயணிகளிடமிருந்தும் ஸ்பெயின் நாட்டுடன் ஏற்படுத்திக்கொண்ட உறவிலிருந்தும் அந்நியச் செலாவணி கிடைத்தபோதிலும் இரு விதமான சந்தைகள் உருவாயின.
ஒன்று, சுற்றுலாப் பயணிகளுக்கும் வெளிநாட்டு வணிகர்களுக்கும் அவர்களின் உள்நாட்டுத் தரகர்களுக்கும் தேவையான பொருள்களையும் வசதிகளையும் பெறுவதற்குத் தேவையான அமெரிக்க டாலர்களைப் பயன்படுத்தும் சந்தை; இன்னொன்று கியூபக் குடிமக்கள் தங்கள் நாட்டு நாணயத்தைப் பயன்படுத்துகின்ற, ஆனால் பெரிதும் காலியாக இருந்த கடைகளைக் கொண்ட சந்தை.
இன்றியமையாத பொருள்களின் பற்றாக்குறையும் இருவிதமான சந்தைகளின் செயல்பாடுகளும் மக்களிடையே பெரும் அதிருப்தியை ஏற்படுத்தியிருந்தாலும், புரட்சிகர அரசைத் தூக்கியெறிய அமெரிக்கா மேற்கொண்ட பரப்புரைகள், ராணுவ - உளவுத் துறைச் செயல்பாடுகள் ஆகியவற்றுக்கு அந்த நாட்டின் மிகப் பெரும்பான்மையான மக்களிடமிருந்து எவ்வித ஆதரவும் கிடைக்கவில்லை.
பின்னர் ரஷ்யா, சீனா ஆகிய நாடுகளுடனான வணிகமும் கியூபாவில் எரிசக்தித் தேவையை நிறைவு செய்வதற்காக வெனிசுலா வழங்கிவந்த எண்ணெய்யும் கியூப மக்களுக்கு ஆறுதலாக இருந்தன. கடும் சோதனைகள் நிறைந்த காலக்கட்டத்திலும் கியூப மருத்துவ ஆராய்ச்சித் துறை மிகப் பெரும் வளர்ச்சியையும் மேம்பாட்டையும் கண்டது; உயிரியல், வேதியியல், நானோ தொழில்நுட்பம் ஆகியவற்றில் பெரும் முன்னேற்றமடைந்து கொடிய நோய்களைக் குணப்படுத்துகின்ற மருந்துகளை உற்பத்தி செய்தது; கரோனா பெருந்தொற்று பரவிய காலத்தில், அதைத் தடுக்கும் ஊசி மருந்துகளைக் கண்டுபிடித்து அவற்றைத் தன் மக்களுக்கு மட்டுமன்றி பல்வேறு நாடுகளுக்கும் வழங்கியது.