அமெரிக்காவிலிருந்து வெளிவரும் ‘How’ என்ற காண்பியல் கலைஞர்களுக்கான இருமாத இதழின் பிரதி ஒன்றை 1988இன் தொடக்கத்தில் படித்தேன். பி.சி. (PC), ஆப்பிள் ஆகியவற்றுக்கு முந்தைய Amiga கம்ப்யூட்டரை ஓர் ஓவியர் எப்படிப் பயன்படுத்துகிறார் என்பதை விளக்கப் படங்களுடன் விவரித்திருக்கும் விரிவான கட்டுரை அதில் இடம்பெற்றிருந்தது. அதுவே என்னைத் தூக்கமில்லாமல் தொடர்ந்து தேடுவதற்குத் தூண்டியது என்று நம்புகிறேன்.
சிறுவயதில் ஓவியம் தீட்டுகிற ஆர்வம் எனது தந்தையாரால் ஊக்குவிக்கப்பட்டதுடன், அந்த வயதிலேயே வால்ட் டிஸ்னி படங்களையும், பிரமாண்டமான ஹாலிவுட் சரித்திரப் படங்களையும் தொடர்ந்து பார்க்கவும், படங்கள் நிறைந்த புத்தகங்கள் சுற்றியிருக்கும் படியான சூழலும் எங்களுக்குக் கிடைத்தது. அதனால் வீட்டுக்குத் தெரியாமல், எட்டாம் வகுப்பு படிக்கும்போது சேர்த்து வைத்த காசில் Box camera வாங்கிவிட்டேன்.
அப்போது எனக்கு வால்ட் டிஸ்னிதான் ஆதர்சம். ஓவியக் கல்லூரியில் சேர்ந்த பின் எனது பார்வை விரிவடைந்தாலும், Animation (உயிரோவியம்) மீதான காதலும் தேடுதலும் நிற்கவில்லை. Art of Animation குறித்து நான் மட்டுமே கல்லூரியில் பேசிக்கொண்டு திரிவேன். அது சார்பான புத்தகங்களை மூர் மார்க்கெட்டில் தேடி அலைவேன். அதன் பின் திரைப்படத்துறை - விளம்பரத்துறை - திரைப்படக் கல்லூரி நண்பர்களுடன் அனிமேஷனைத் தொடர்ந்து கற்றும் முயன்றும் வந்த போதுதான் மேற்குறிப்பிட்ட கட்டுரையைப் படித்தேன்.
