ரூ.1 கோடி மதிப்பில் வாழும் தமிழ் இலக்கிய விருது

இந்தியாவிலேயே மிகப்பெரிய இலக்கிய விருது கடந்த புதன்கிழமை (மார்ச் 25) அன்று டெல்லியில் அறிவிக்கப்பட்டது. ரூ.1 கோடி மதிப்புள்ள‘வாழும் தமிழ் உலக இலக்கிய விருது’, உலக இலக்கியத்திலும் இந்திய இலக்கியத்திலும் முதன்மையான படைப்பாளர்களை அடையாளம் காட்டும் நோக்கம் கொண்டது..ஞானபீடப் பரிசு குறித்த விமர்சனங்கள்: 2026ஆம் ஆண்டுக்கான ஞானபீடப் பரிசு, வெகுஜனச் செல்வாக்கு மற்றும் அரசியல் தொடர்புகளை மட்டுமே அளவுகோலாகக் கொண்டது என்றும், அதில் இலக்கிய மதிப்பீடுகள் கடைப்பிடிக்கப்படவில்லை என்றும் தமிழ் எழுத்தாளர்களிடமிருந்து ஒருமித்த எதிர்ப்பு உருவானது. எழுத்தாளர்களும் வாசகர்களும் ஞானபீடப் பரிசு குழுவுக்கு மூன்று வெவ்வேறு கூட்டு மனுக்கள் வழியாகக் கடுமையான கண்டனங்களைத் தெரிவித்தார்கள்.பாலியல் குற்றச்சாட்டுகளுக்கு ஆளான ஒருவருக்கு விருது அளிக்கப்பட்டிருப்பது, விருது பெறுபவர் முன்னுதாரணமான நடத்தை கொண்டிருக்க வேண்டும் என்னும் ஞானபீடத்தின் கொள்கைக்கு எதிரானது என்று பெண்கள் அமைப்புகள் கண்டித்தன..ஒரு மொழியின் தலைசிறந்த படைப்புக்கே விருது அளிக்கப்பட வேண்டும். ஏனென்றால், அதை அடிப்படையாகக் கொண்டே பிற மொழியினர் அந்த மொழியின் படைப்புகளை மதிப்பிடுவார்கள். அந்த மொழியில் உருவாகி வரும் புதிய தலைமுறையினருக்குச் சீரிய இலக்கியமே முன்னுதாரணமாக அமைய வேண்டும்; மேலோட்டமான கருத்துகளைச் சொல்லும் வெகுஜன எழுத்து அந்த இடத்தில் வைக்கப்படக்கூடாது. அது இலக்கியத்தின் தீவிரத்தை அழிப்பதாகும்..நவீனத் தமிழிலக்கியத்தின் நிலை தமிழின் இலக்கியச் சூழல் இந்திய அளவிலேயே மிகத் தீவிரமானது. தமிழின் முதன்மையான படைப்பாளிகள் உலக அளவில் எழுதும் எந்த எழுத்தாளர்களுக்கும் நிகரானவர்கள். ஆனால், நவீனத் தமிழிலக்கியம் இன்றுவரை எந்த இந்திய அரங்கிலும் மதிப்பு பெறவில்லை.எந்தத் தமிழிலக்கிய மேதையும் இன்றுவரை இந்திய அளவில் கவனிக்கப்பட்டதில்லை. அந்த உதாசீனத்திற்குக் காரணம் நம் இலக்கியமும் இலக்கிய மேதைகளும் இன்றுவரை சரியானபடி முன்னிறுத்தப்படுவதில்லை என்பதுதான். இங்குள்ள பல்கலைக்கழகங்கள் இலக்கிய மேதைகளைப் பொருட்படுத்துவதில்லை; அவர்கள் அரசியல் செல்வாக்குள்ளவர்களையே முன்னிறுத்துகிறார்கள். ஆகவே, நவீனத் தமிழிலக்கியம் இன்று அறியப்படாமலேயே உள்ளது..இந்தி, வங்கம், கன்னடம், உருது, மலையாளம் போன்ற பிற மொழிகளில் இச்சூழல் இல்லை. அங்குள்ள முதன்மையான இலக்கிய மேதைகளே முன்னிறுத்தப்படுகிறார்கள். ஆகவே, அவர்களின் இலக்கியமும் உயர்ந்தது என்ற சித்திரம் இந்திய அளவில் உள்ளது. அந்த மொழிகளில் ஞானபீடம் போன்ற பரிசுகளைப் பெற்றவர்கள் வெகுஜன எழுத்தாளர்கள் அல்ல, தீவிரமான இலக்கியப் படைப்பாளிகள்.நியூயார்க் மாநாடும் புதிய விருதும்: நவீனத் தமிழிலக்கியத்தின் தீவிரமான தளத்தை உலகுக்கு அறிவிக்க வேண்டும் என்னும் நோக்கத்துடன் வரும் ஏப்ரல் 3 மற்றும் 4 ஆகிய தேதிகளில் நியூயார்க் நகரில் ‘வாழும் தமிழ் இலக்கிய விழா’ நிகழவுள்ளது. ஓர் இந்திய மொழியின் நவீன இலக்கியத்துக்காக அமெரிக்காவில் நிகழும் முதல் விழா இது. அமெரிக்காவில் இயங்கும் விஷ்ணுபுரம் இலக்கிய வட்டம் இவ்விழாவை நடத்துகிறது. அந்நாட்டில் பிறந்த புதிய தலைமுறையினர் இதை நடத்துகிறார்கள். ஆங்கிலத்தில் நிகழும் இவ்விழாவில் 30 தமிழ் எழுத்தாளர்களும், 15 அமெரிக்க - ஆங்கில எழுத்தாளர்களும் கலந்துகொள்கிறார்கள். .தமிழ் நவீன இலக்கிய அறிவுச்சூழலால் ஏற்கப்படாத ஒருவருக்கு ஞானபீடப் பரிசு அளிக்கப்படுவது என்பது எல்லாவகையிலும் நவீனத் தமிழிலக்கியத்தின் தரம் பற்றிய குறைவான பார்வையை இந்திய அளவில் உருவாக்கும் என்ற எண்ணம் ஏற்பட்டமையால், ‘வாழும் தமிழ் உலக இலக்கிய விருது’ அறிவிக்கப்பட்டுள்ளது. ஒரு கோடி ரூபாய் மதிப்புள்ள இவ்விருது இந்தியாவில் அளிக்கப்படும் இலக்கிய விருதுகளிலேயே பெரியது; உலக அளவிலும் பெரிய விருதுகளில் ஒன்றாகும்.இலக்கிய அழகியலும் மதிப்பீடுகளும்: ஓர் எதிர்ப்பின் விளைவாக இந்த விருது உருவானதாயினும், இதை ஒரு நேர்நிலைச் செயல்பாடாக ‘வாழும் தமிழ் இலக்கிய அமைப்பு’ முன்னெடுக்கும். உலக இலக்கியத்தின் உண்மையான கலையுச்சங்களை அடையாளம் காண்பதே இவ்விருதின் நோக்கம். இந்த எண்ணம், இதையொட்டிய விவாதம் பத்தாண்டுகளாகவே விஷ்ணுபுரம் இலக்கிய வட்ட நண்பர்களுக்குள் நிகழ்ந்துள்ளது. இப்போது இதை நடைமுறையாக ஆக்க இந்த விவாதத்தின் தருணம் உதவுகிறது. இத்தகைய தீவிரமான தருணங்களே அனைத்து ஆதரவுகளையும் ஒருங்கிணைக்க உதவுகின்றன..எளிமையான சமூகச் சித்திரங்களை அல்லது அரசியல் சரிகளை எழுதி, அவற்றையே இலக்கியமாக முன்வைக்கும் போக்கு இந்தியாவில் இன்று பரவலாக உள்ளது. ஏராளமானவர்களால் வாசிக்கப்பட்டால் அது இலக்கியம் என எண்ணுவதும் வளர்ந்து வருகிறது. இதை மேலைநாட்டு இலக்கிய விமர்சகர்கள் கண்டித்துள்ளனர். வாழும் தமிழ் இலக்கிய விருதை, இலக்கியம் என்னும் மாபெரும் இயக்கத்தின் மேல் நம்பிக்கை கொண்டவர்கள் உருவாக்குகின்றனர். இலக்கியத்தில் அரசியல் உண்டு; தத்துவமும் வரலாறும் உளவியலும் உண்டு.அனைத்தையும் ஒருங்கிணைப்பது அழகியல். அந்த அழகியலையே அளவீடாகக் கொள்ளவிருக்கின்றனர். மொழிநடை, வடிவ இசைவு, மறை பிரதி அல்லது உட்சிக்கல், வரலாற்றுத்தன்மை, தனக்கேயான தரிசனம் ஆகிய ஐந்தும்தான் இலக்கிய அழகியலின் அடிப்படைகள். அந்த அழகியல், இந்த மூவாயிரம் ஆண்டுகளாக உலக இலக்கியம் திரட்டியுள்ள செவ்வியல் படைப்புகளால் உருவாவது. அச்செவ்வியலை ஆழ்ந்து படித்த வாசகர்கள், தேர்ந்த விமர்சகர்கள் இவ்விருதை முடிவு செய்வார்கள்..உலகுக்கான செய்தி: இந்த விருது உலக இலக்கியம், இந்திய இலக்கியம், தமிழிலக்கியம் ஆகியவற்றை முன்வைப்பது. உலக இலக்கியத்தின் சாதனையாளர்களை இந்தியாவுக்கும், இந்திய இலக்கியத்தின் சாதனையாளர்களை நமக்கும் அடையாளம் காட்டுவதே இதன் பணி. இந்த விருதின் வழியாக நாம் இங்கே மிகத் தீவிரமாக வாசித்துக்கொண்டும் எழுதிக்கொண்டும் இருக்கிறோம் என்னும் செய்தி இந்திய இலக்கிய சூழலுக்கும், உலக இலக்கிய வாசகர்களுக்கும் சென்று சேரும். இங்குள்ள அறிவியக்கத்தை அவர்கள் அறிய முற்படுவார்கள். இதனால் நம் நவீன இலக்கியத்தையும் இலக்கிய முன்னோடிகளையும் உலகுக்கு அறிமுகம் செய்ய முடியும்.உலகில் பல நாடுகளில் தமிழர்கள் வாழ்கின்றனர். குறிப்பாக இந்தியா, மலேசியா, சிங்கப்பூர், இலங்கை, அமெரிக்கா மற்றும் பர்மா ஆகிய நாடுகளில் அதிகளவில் வசிக்கின்றனர். அங்கெல்லாம் நவீன இலக்கியத்திற்குத் தீவிர வாசகர்கள் உள்ளனர். நீண்டகாலமாக அவமதிக்கப்பட்டுப் புறக்கணிக்கப்பட்ட நவீனத் தமிழிலக்கியம் பற்றிய ஆழமான வருத்தம் அனைத்து வாசகர்களுக்கும் உண்டு. அவர்களே இந்த விருதுக்கான நிதியுதவிகளைச் செய்யவிருக்கின்றனர். நவீனத் தமிழிலக்கியத்தில் நியூயார்க் மாநாடும் இந்த விருதும் ஒரு முக்கிய திருப்புமுனையாக அமையும். .பேரவைத் தேர்தல் 2026: மகளிர் வாக்கு என்கிற மந்திரக்கோல்

ரூ.1 கோடி மதிப்​பில் வாழும் தமிழ் இலக்​கிய விருது

அதிகம் வாசித்தவை...

ரூ.1 கோடி மதிப்பில் வாழும் தமிழ் இலக்கிய விருது