சுமார் 25 ஆண்டுகளுக்கு முன்பு, நாங்கள் முதன்முதலாக ஒலிப் புத்தகத்தை (Audio book) அறிமுகப்படுத்தியபோது, அது ஒரு பெரும் வியப்பாகப் பார்க்கப்பட்டது. ‘கற்றலிற் கேட்டலே நன்று’ என்ற வகையில் அதற்கு நல்ல வரவேற்பு கிடைத்த போதிலும், அன்றைய சூழலில் தயாரிப்புச் செலவு அதிகமாக இருந்ததால் அத்திட்டத்தைத் தொடர இயலவில்லை. ஆனால், எதிர்காலத்தில் ஒலிப் புத்தகங்கள் பெரும் தாக்கத்தை ஏற்படுத்தும் என்று அன்று கணித்தோம்.
தொழில்நுட்பப் போட்டியும் மாற்றமும்: காலப்போக்கில் அறிவியல் வளர்ச்சி நாம் எதிர்பாராத திசையில் ‘மின் புத்தகங்களை’ (E-books) முன்னிறுத்தியது. அச்சுப் புத்தகமா, மின் புத்தகமா என்ற போட்டியில் ஒலிப் புத்தகங்கள் சற்றே பின்வாங்கினாலும், வாசிப்பு உலகில் தனக்கென ஒரு தனித்துவமான இடத்தை அவை இன்றும் தக்கவைத்துள்ளன. இன்று செயற்கை நுண்ணறிவின் (AI) துணையோடு, ஒரு புத்தகத்தை வாசிக்காமலேயே அதில் உள்ள கருத்துக்களை நொடியில் கிரகித்துக்கொள்ளும் வாய்ப்பு உருவாகியுள்ளது.
இதனால் பலரும் குறிப்பாக, மாணவர்கள் பெரும் பயன்பெற்று வருவதைக் காண்கிறோம். இருப்பினும், ஒரு திரைப்படத்தைப் பற்றி மற்றவர் சொல்லக் கேட்பதற்கும், நாமே திரையில் காண்பதற்கும் உள்ள வித்தியாசத்தைப் போலத்தான் இதுவும். செயற்கை நுண்ணறிவின் புரிதலை விட நம்முடைய நேரடி வாசிப்பு அனுபவம் ஆழமானது; அந்தச் சுய வாசிப்பில் கிடைக்கும் இன்பம் அளப்பரியது.