காலநிலை மாற்றமும் சுற்றுச்சூழல் சீர்கேடுகளும் அதிகரித்துவரும் சூழலில் ஒவ்வோர் ஆண்டும் முக்கியமான முடிவுகளை எடுத்துச் செயல்பாடுகளைத் துரிதப்படுத்த வேண்டிய கட்டாயத்தில் மனித இனம் இருக்கிறது. அந்த வகையில், 2025இல் என்னென்ன செயல்பாடுகள் முன்னெடுக்கப்பட்டன, அவை முழுமையானவையா?
ஐ.நா. பெருங்கடல் மாநாடு: ஐ.நா. அவையின் பெருங்கடல் மாநாடு 2025 ஜூன் மாதம் நடைபெற்றது. 60க்கும் மேற்பட்ட தலைவர்கள், 15,000 பங்கேற்பாளர்கள் கலந்துகொண்ட இம்மாநாட்டில் பல முக்கிய முடிவுகள் எடுக்கப்பட்டன. கடல் சூழலியல் பாதுகாப்பு, கடல் அறிவியலுக்காக 1 பில்லியன் யூரோ (ஏறக்குறைய ரூ,1,068 கோடி) நிதி உதவி தருவதாக ஐரோப்பிய ஆணையம் அறிவித்தது.
உலகின் மிகப்பெரிய கடல் பாதுகாப்புப் பகுதியைத் தமது கடற்பகுதியில் ஏற்படுத்த இருப்பதாக பிரெஞ்சு பாலினேசியத் தலைவர்கள் அறிவித்தனர். கடலுக்கு அடியில் ஏற்படும் ஒலி மாசுபாட்டைக் கட்டுப்படுத்துவதற்கான ‘அமைதியான கடல்’ என்கிற முக்கிய ஒப்பந்தத்தில் 37 நாடுகள் கையெழுத்திட்டன. 2030க்குள் கடல், நிலம் உள்ளிட்ட 30% புவிப்பரப்பைப் பாதுகாப்பதற்கான ஒப்பந்தம் மீண்டும் உறுதிப்படுத்தப்பட்டது.
வணிகச் செயல்பாடுகள்: அழிந்துவரக்கூடிய உயிரினங்கள் சார்ந்த வணிகத்துக்கான சர்வதேச ஒப்பந்தத்தின் 20ஆவது உச்சி மாநாடு உஸ்பெகிஸ்தானில் நவம்பர் மாதம் நடைபெற்றது. இந்த மாநாடு இரண்டு அல்லது மூன்று வருடங்களுக்கு ஒருமுறை மட்டுமே நடைபெறும் என்பதாலும், இந்தக் கால அவகாசத்துக்குள் உயிரிகளின் நிலை பற்றிய புதிய தரவுகள் வந்துவிடும் என்பதாலும் மிகப்பெரிய எதிர்பார்ப்பு இருந்தது.
150 நாடுகள் கலந்துகொண்ட இந்த மாநாட்டில் பல முக்கிய முடிவுகள் எடுக்கப்பட்டன. பல ஆசியப் பூனை இனங்கள், சுறாக்கள், திருக்கை மீன்கள் ஆகியவை உள்ளிட்ட 77 இனங்கள் பட்டியலில் சேர்க்கப்பட்டிருக்கின்றன. இவற்றின் பாதுகாப்பு உறுதி செய்யப்பட்டிருக்கிறது. இதுபோன்ற செயல்பாடுகளுக்கான நிதியும் 7% உயர்த்தப்பட்டிருக்கிறது. இதில் குறிப்பாக, சுறா போன்ற குருத்தெலும்பு மீன் இனங்கள் சார்ந்த பாதுகாப்பு மிகப்பெரிய வெற்றியாகப் பார்க்கப்படுகிறது.
காலநிலை உச்சி மாநாடு: காலநிலை மாற்றத்துக்கான 30ஆவது உச்சி மாநாடு பிரேசிலில் நவம்பர் மாதம் நடைபெற்றது. இந்த ஆண்டும் எதிர்பார்த்ததைப் போலவே மாநாட்டில் பெரிய, முக்கிய முடிவுகள் எதுவும் எட்டப்படவில்லை. காலநிலை மாற்றத்துக்கு மறுப்பாளரான அமெரிக்க அதிபர் டிரம்ப்பின் தாக்கம் இந்த மாநாட்டில் அதிகமாக இருந்தது.