எழுதுவது பெண்களுக்கு மட்டுமா? - எழுத்தாளர் பா.ஜீவசுந்தரி | கருத்துப் பேழை சந்திப்பு

எழுத்தாளர், பத்திரிகையாளர், பேச்சாளர், பெண்ணியவாதி எனப் பல பரிமாணங்களைக் கொண்டவர் பா.ஜீவசுந்தரி. ‘மூவலூர் இராமாமிர்தம்: வாழ்வும் பணியும்’, ‘பெண் எனும் பகடைக்காய்’, ‘விலக மறுக்கும் திரைகள்’ உள்ளிட்ட அவரது நூல்கள் பெரிதும் வரவேற்பைப் பெற்றவை. அவருடனான உரையாடலிலிருந்து....பன்முகத்தன்மை கொண்ட ஆளுமையாக நீங்கள் உருவானதன் பின்னணி பற்றிச் சொல்லுங்கள்..என் அப்பா கடலூர் பாலன், ஒரு போட்டோ ஸ்டுடியோ வைத்திருந்தார். பொதுவுடைமை இயக்கத்திலும் அவர் தீவிரமாகச் செயல்பட்டதால், ஸ்டுடியோவை எங்கள் அம்மாதான் கவனித்துக்கொண்டார். அப்பா பாடகர்; வில்லுப்பாட்டுக் கலைஞரும்கூட. ருசியாகச் சமைப்பார், அழகாக எழுதுவார், வரைவார். அவர் மூலமே எனக்கு வாசிப்பில் ஆர்வம் வந்தது. வீட்டுக்கு வரும் தோழர்கள், தலைவர்களின் பேச்சைக் கேட்டு நான் வளர்ந்ததால் ஆர்வம் அதிகரித்தது. எட்டாம் வகுப்போடு என் பள்ளிப் படிப்பை நிறுத்த வேண்டிய சூழல். பின்னர் முயன்று பி.ஏ. தமிழ் இலக்கியம் படித்தேன். பல துறை நூல்களையும் படித்து என்னை மேம்படுத்திக்கொண்டேன்..எழுத்தின் மீது ஆர்வம் வந்தது எப்படி?பத்திரிகைகளை வாங்குவதற்காக நான்தான் கடைக்குச் செல்வேன். வரும் வழியிலேயே அமர்ந்து படித்துவிடுவேன். ரஷ்ய இலக்கியங்களையும் விரும்பிப் படித்தேன். புத்தகத்தில் உள்ள கதைகளை அப்பா அழகாகச் சொல்வார்; நாங்கள் படிக்க வேண்டுமென்ற எண்ணத்தால், முடிவை மட்டும் சொல்ல மாட்டார். அதனாலேயே நாங்கள் அனைவரும் படிக்க ஆரம்பித்தோம். பின்னர் நியூ செஞ்சுரி புக் ஹவுஸில் பணியாற்றினேன். நவீன இலக்கியங்களைத் தேடித் தேடிப் படித்தேன். சமூகத்தை எவ்வாறு பார்க்க வேண்டும் என்கிற தெளிவு கிடைத்தது..பத்திரிகையாளராகச் செயல்பட்ட அனுபவங்கள் எப்படி இருந்தன?ஓர் அறக்கட்டளை நடத்திய பள்ளியில் தமிழாசிரியராகச் சிறிது காலம் வேலை பார்த்தேன். கலை இலக்கியப் பெருமன்றத்தின் மூலம் குழந்தைகளை வழிநடத்தினேன். அவர்களில் பலர் பிற்காலத்தில் சாதி மறுப்புத் திருமணம் செய்துகொண்டபோது மிகவும் மகிழ்ச்சியாக இருந்தது. ‘கண்ணாடி’ என்கிற கையெழுத்துப் பத்திரிகையையும் அதன் மூலம் நடத்தினோம். நானும் என் நண்பரும் இணைந்து பாரதி நூலகத்தைச் சில ஆண்டுகள் நடத்தினோம். பிறகு, ‘வளர்தொழில்’ வணிக இதழ் குழுமம் ஆரம்பித்த, ‘பிக்கிக்கா’ சிறார் வார இதழில் பணிபுரிந்தேன். தமிழில் பெண்கள் பத்திரிகையாளர் ஆவது அரிதாக இருந்த அந்தக் காலக்கட்டத்தில், ‘போலீஸ் செய்தி’ என்கிற புலனாய்வு வார இதழில் பத்திரிகையாளராகச் செயல்பட்டேன். அடுத்து, ‘புதிய பார்வை’, ஆறாம் திணை’ இணைய இதழ், இரண்டு மகளிர் இதழ்கள் எனப் பல பத்திரிகைகளில் பணி அமைந்தது. .இதழியல் துறையில் பெண்கள் எதிர்கொள்ளும் சவால்கள் என்ன?பெண்கள் நுண்ணுணர்வு மிக்கவர்கள். கவர்ச்சியாக ஒரு படத்தை வைத்து லே-அவுட் செய்ய மாட்டார்கள். கிளுகிளு தலைப்புகளை வைக்க விரும்ப மாட்டார்கள். நான் புலனாய்வுப் பத்திரிகையில் பணியாற்றியபோது, ஒரு தாயும் மகளும் வந்தார்கள். அந்தச் சிறுமி தன் தந்தையால் பாலியல் வன்கொடுமை செய்யப்பட்டதாகக் கூறினார். அதற்கு ஏன் பத்திரிகை அலுவலகத்துக்கு வந்தீர்கள் என்று கேட்டபோது, செய்தி வந்தால் தீர்வு கிடைக்கும் என்றார். காவல் துறையில் புகார் அளிக்கச் சொல்லி, அவர்களை அனுப்பி வைத்தேன். ஏன் அந்தப் பெண்ணின் கதையைக் கட்டுரையாக எழுதவில்லை என்று அலுவலகத்தில் கேட்டார்கள். இந்த விஷயத்தில் புகார் கொடுப்பதுதான் அந்தப் பெண்ணுக்குரிய நியாயமாக எனக்குத் தெரிகிறது என்றேன். இப்படிப் பல சவால்கள் உண்டு..மூவலூர் இராமாமிர்தம் நூலை எழுதியதற்கான காரணம்?மூவலூரில் நான் இருந்தபோது, பிரச்சாரத்துக்காக வந்த ஜெயலலிதா, ‘மூவலூர் இராமாமிர்தம் வாழ்ந்த ஊர் இது’ என்று பேசினார். அந்த நொடி எனக்கு அவரைத் தேடிச்செல்லும் ஆர்வம் ஏற்பட்டது. பல ஆண்டுகள் முயன்று, பலரையும் சந்தித்துத் தகவல்களைச் சேகரிக்க ஆரம்பித்தேன். எல்லாவற்றையும் வைத்து எழுதிய அந்த நூல், 2006இல் வெளியானது. பின்னர் பேராசிரியர் பாரதி ஹரிசங்கர் அதை ஆங்கிலத்தில் சிறப்பாக மொழிபெயர்த்தார்; தமிழ்நாடு பாடநூல் - கல்வியியல் பணிகள் கழகம், எழுத்தாளர் ஊர்வசி புட்டாலியாவின் ஸுபான் பதிப்பகத்துடன் இணைந்து அதை வெளியிட்டுள்ளது..திரைத் துறை சார்ந்தும் தொடர்ந்து எழுதிக்கொண்டிருக்கிறீர்கள்?பொன்மலை நாடக மன்றத்தில் அப்பா செயல்பட்டிருக்கிறார். சில திரைப்படங்களிலும் பணியாற்றியுள்ளார். படங்களுக்கும் அழைத்துச் செல்வார். அப்படித்தான் சினிமா சார்ந்த தகவல்கள் மீது எனக்குப் பிடிப்பு ஏற்பட்டது. 2013இல் தமிழ்த் திரைப்பட நூற்றாண்டை ஒட்டி ‘காட்சிப்பிழை’ சினிமா ஆய்விதழில் தொடர் எழுதக் கேட்டார்கள். 1930களில் நடிக்கவந்த பெண் திரைக்கலைஞர்கள் குறித்து ‘ரசிகை பார்வை’ என்கிற தொடர் எழுதினேன். தொடர் நல்ல வரவேற்பைப் பெற்றதுடன் நூலாகவும் வெளிவந்து, சிறந்த பெண்ணிய நூல் விருதும் பெற்றது. பின்னர் ‘செல்லுலாய்ட் பெண்கள்’ என்கிற தலைப்பில் 50களின் பெண் கலைஞர்கள் குறித்து ஒரு தொடர் எழுதினேன். விஜயகுமாரி, சௌகார் ஜானகி, சச்சு போன்ற மூத்த திரைக் கலைஞர்கள், ‘எங்களைப் பற்றி வித்தியாசமாக எழுதிப் பெருமைப்படுத்தியிருக்கிறீர்கள்’ என்று பாராட்டினர்..உங்களின் எதிர்காலத்திட்டம் என்ன?மூவலூர் இராமாமிர்தம் பற்றி ஓர் ஆவணப்படம் எடுக்க வேண்டும் என்கிற ஆசை இருக்கிறது. அதற்கு நண்பர்கள் உதவி தேவை. தற்போது எழுத்தாளர் ராஜம் கிருஷ்ணனின் தேர்ந்தெடுக்கப்பட்ட படைப்புகள் (Reader) ஒன்றைத் தொகுத்துக்கொண்டிருக்கிறேன்..ஒரு பெண்ணியவாதியாக இன்றைக்கு இருக்கும் பெண்களின் போக்குக் குறித்து என்ன நினைக்கிறீர்கள்?வரவேற்கும் விதமாகவே இருக்கிறது. ஏராளமான பெண்கள் படித்திருக்கிறார்கள். ஆனால், பலரும் பழமைவாதச் சிந்தனைகளைத் துறக்க மறுக்கிறார்கள். பொருளாதார லாபத்துக்கானது மட்டுமே அல்ல கல்வி; சிந்தனை மாற்றத்தையும் உள்ளடக்கியது என்பதை அவர்கள் உணர வேண்டும். அதன் பொருட்டே நான் தொடர்ந்து எழுதிக்கொண்டிருக்கிறேன்...பெண்களுக்காக மட்டும் அல்ல. ஒட்டுமொத்தச் சமூகத்துக்காகவும்!.- தொடர்புக்கு: sujatha.s@hindutamil.co.in

எழுதுவது பெண்களுக்கு மட்டுமா? - எழுத்தாளர் பா.ஜீவசுந்தரி | கருத்துப் பேழை சந்திப்பு

அதிகம் வாசித்தவை...