தொழில்நுட்ப உலகைப் பொறுத்தவரை 2025ஆம் ஆண்டை எப்படி வரையறுப்பது என்பது சிக்கலானதாகவும், சவாலானதாகவும் மட்டுமல்ல, சுவாரசியமானதாகவும் இருக்கிறது. செயற்கை நுண்ணறிவுதான் இந்த ஆண்டின் மிகப் பெரிய பேசுபொருள்.
அசரவைத்த நுட்பங்கள்: சில ஆண்டுகளுக்கு முன் சாட்ஜிபிடி அறிமுகமானதைத் தொடர்ந்து வீசத் தொடங்கிய ‘ஜென் ஏஐ’ அலை இந்த ஆண்டும் தொடர்ந்தது. ‘ஏஜென்டிக் ஏஐ’ (Agentic AI) என்னும் கருத்தாக்கம் பெரும் தாக்கத்தை ஏற்படுத்தியது. ஜென் ஏஐ சேவைகளை இயக்கும் மொழிமாதிரிகள் சார்ந்த அடுத்தகட்ட சேவையான ஏஜென்டிக் ஏஐ, மனிதத் தலையீடு இல்லாமல் தானாகச் செயல்களை நிறைவேற்றும் ஆற்றலைக் குறிக்கிறது.
பயணச்சீட்டு முன்பதிவு செய்வதில் தொடங்கி, இணைய வணிகத் தளத்தில் பொருள்களை ஆர்டர் செய்வதுவரை நிறைவேற்றும் ஆற்றல் கொண்ட இந்த நுட்பம், வர்த்தக நிறுவனச் செயல்பாடுகளிலும் ஆதிக்கம் செலுத்தும் எனக் கூறப்படுகிறது. ஏஜென்டிக் ஏஐ போலவே இந்த ஆண்டு பெரிதும் பேசப்பட்ட இன்னொரு அம்சம், ‘வைப் கோடிங்’.
செயற்கை நுண்ணறிவின் துணை கொண்டு நிரலாக்கம் செய்வதை இது குறிக்கிறது. ஏஐ என்ன செய்ய வேண்டும் என பிராம்ப்டிங் (Prompting) செய்தால் அதற்கேற்ப உள்ளடக்கத்தை உருவாக்கித் தரப்படுவதைப் போலவே, கோடிங் பரப்பிலும் செயல்படக்கூடிய சேவைகள் கவனத்தை ஈர்த்தன. கோடிங் தெரியாவிட்டாலும்கூட, ஏஐ சேவைகளைக் கொண்டு செயலிகளை உருவாக்கலாம் என்னும் கருத்து தாக்கத்தை ஏற்படுத்தியது.
இன்னொரு பக்கம் பார்த்தால், காமெட் (Comet) போன்ற ஏஐ பிரவுசர்கள் அறிமுகமாகி ஏஐ அலையின் இன்னொரு கிளையாக அமைந்தன. ஏஐ தேடியந்திரம் அறிமுகம் செய்த இந்த பிரவுசர், உரையாடல் தன்மையைக் கொண்டிருந்ததோடு, பயனாளிகள் சார்பில் செயல்படும் திறனையும் பெற்றிருந்தது.