முதல் பெண் பிரதமர்கள்: நேபாளத்தின் முதல் பெண் பிரதமர் ஆனார் சுசீலா கார்கி (73). அந்நாட்டின் முதல் பெண் தலைமை நீதிபதியாகவும் பணியாற்றிய இவர், ஊழலுக்கு எதிராகப் போராடிய ஜென் இசட் இளைஞர்களின் ஏகோபித்த ஆதரவுடன் பிரதமர் ஆகியிருக்கிறார்.
ஜப்பானின் முதல் பெண் பிரதமராக சனே தகைச்சி (64), 2025 அக்டோபர் 21இல் பதவியேற்றார். 2025ஆம் ஆண்டின் ‘போர்ப்ஸ்’ இதழ் வெளியிட்ட உலகின் சக்திவாய்ந்த 100 பெண்கள் பட்டியலில் மூன்றாவது இடத்தைப் பிடித்திருக்கிறார். ஜப்பானின் ‘இரும்புப் பெண்’ என்றும் அழைக்கப்படுகிறார்.
அதிரடி அதிபர்: அமெரிக்காவின் 47ஆவது அதிபராக ஜனவரி 20 அன்று பதவியேற்ற டிரம்ப், குடியேற்ற விதிகளில் கடுமையான கட்டுப்பாட்டைக் கொண்டுவந்தார். அவருடைய குடியரசுக் கட்சி தாக்கல் செய்த பட்ஜெட் நாடாளுமன்றத்தில் நிறைவேறாததால், வரலாறு காணாத நிர்வாக முடக்கத்தை அமல்படுத்தி 43 நாள்கள் அமெரிக்காவை ஸ்தம்பிக்க வைத்தார்.
செயற்கை நுண்ணறிவு (ஏஐ), 6ஜி தொழில்நுட்பம் போன்றவற்றில் கவனம் செலுத்தினார். இஸ்ரேல் - ஹமாஸ் போரை நிறுத்துவதில் வெற்றிகண்டார். உக்ரைன் போரை நிறுத்துவதில் மும்முரமாக ஈடுபட்டிருக்கிறார்.
பேசுபொருளான பிரதமர்: பிரிட்டன் பிரதமர் கியர் ஸ்டாமர் 2025இல் பல்வேறு விஷயங்களுக்காகப் பேசப்பட்டார். கல்வி, வெளியுறவுக் கொள்கைகள், பொருளாதார நடவடிக்கைகளில் புதிய மாற்றங்கள் கொண்டுவந்தார். 50 ஆயிரம் குழந்தைகளுக்கு மதிய உணவுத் திட்டத்தை நடைமுறைப்படுத்தினார்.
எனினும், பல்வேறு நலத்திட்டங்களுக்கான நிதி ஒதுக்கீட்டைக் குறைத்ததால் எதிர்ப்புக்கும் உள்ளானார். ‘அந்நியர்களின் தீவாக’ பிரிட்டன் மாறுவதாகப் பேசியதற்காக விமர்சிக்கப்பட்டாலும், பாலஸ்தீனத்தைத் தனி நாடாக அங்கீகரித்ததன் மூலம் கவனம் ஈர்த்தார்.
பன்மைத்துவ மேயர்: நியூயார்க் நகர மேயராக ஸோஹ்ரன் மம்தானி தேர்ந்தெடுக்கப்பட்டார். இவர் நியூயார்க்கின் முதல் இஸ்லாமிய, இந்திய வம்சாவளி மேயர். 1892க்குப் பிறகு அமெரிக்காவின் மிக இளைய மேயர் என்னும் பெருமைக்குரியவர். இவரது வெற்றி டிரம்ப்பின் பின்னடைவாகக் கருதப்படுகிறது. இந்தியா விடுதலை பெற்றபோது நேரு ஆற்றிய புகழ்பெற்ற உரையை மேற்கோள் காட்டி, தமது முதல் உரையை ஆற்றியதன் மூலம் ஸோஹ்ரன் கவனம் ஈர்த்தார்.
சர்ச்சை ஆன அமைதிப் பரிசு: அமைதிக்கான நோபல் பரிசு (2025) பெற்ற முதல் வெனிசுவேலா பெண் மரியா கொரினா மச்சாடோ. 2011 முதல் 2014வரை வெனிசுவேலா தேசிய சட்டமன்ற உறுப்பினராக இருந்தவர். அதிபர் நிக்கோலஸ் மதுரோவின் அரசியல் நிலைப்பாடுகளைக் கடுமையாக எதிர்ப்பவர்.
2024இல் அதிபர் தேர்தலில் போட்டியிட இவருக்குத் தடை விதிக்கப்பட்டது. எதிர்க்கட்சிகளை ஒருங்கிணைத்துத் தேர்தலில் வழிநடத்தினார். அமைதிக்குப் பங்களிக்காத இவருக்கு அமைதி நோபல் பரிசு வழங்கப்பட்டது கடுமையாக விமர்சிக்கப்பட்டது.
சிக்கலுக்கு உள்ளாகும் தலைவர்: வங்கதேச மாணவர் போராட்டங்களால் ஷேக் ஹசீனா ஆட்சி 2024இல் கவிழ்ந்த பிறகு, இடைக்கால அரசின் தலைவராகப் பொறுப்பேற்ற முகமது யூனுஸ், 2025இல் பல்வேறு சர்ச்சைகளில் சிக்கினார். வங்கதேச மாணவர் தலைவர்கள் சமீபத்தில் கொல்லப்பட்ட / தாக்கப்பட்ட சம்பவங்களுக்குப் பின்னால் இவரது அரசின் சதி இருப்பதாகக் குற்றச்சாட்டு எழுந்துள்ளது.
தொழிலதிபரின் ‘அரசியல்’ - உலகின் பெரும் தொழிலதிபரான எலான் மஸ்க், அமெரிக்க அதிபர் தேர்தலில் டிரம்ப்புக்கு வெளிப்படையாக ஆதரவு திரட்டியதுடன், அவரது நெருங்கிய நண்பராகவும் மாறினார். எனினும், டிரம்ப் கொண்டுவந்த புதிய வரி - செலவினச் சட்டத்தை எதிர்த்து அவருடன் மோதினார். அதேவேகத்தில் ‘அமெரிக்கா கட்சி’ என்னும் புதிய அரசியல் கட்சியைத் தொடங்குவதாகவும் அறிவித்தார். பிறகு, டிரம்ப்புடன் சமரசம் ஏற்பட்டதால் அத்திட்டத்தைக் கைவிட்டார்.
விண்வெளி நாயகி: நாசாவின் விண்வெளி ஆராய்ச்சியில் ஈடுபட்ட இந்திய வம்சாவளி அமெரிக்க விண்வெளி வீராங்கனை சுனிதா வில்லியம்ஸ், ‘போயிங் ஸ்டார்லைனர்’ விண்கலத்தில் ஏற்பட்ட தொழில்நுட்பக் கோளாறு காரணமாக 9 மாதங்களுக்கு மேல் சர்வதேச விண்வெளி நிலையத்தில் இருக்க நேரிட்டது. 2025, மார்ச் 18 அன்று பூமிக்குத் திரும்பினார். இதன் மூலம் விண்வெளியில் மொத்தமாக 600 நாள்களைக் கடந்த இரண்டாவது வீராங்கனை ஆனார்.
போப்பின் காலநிலை அக்கறை: கத்தோலிக்கத் திருச்சபையின் 266ஆவது தலைவராகப் பொறுப்பு வகித்த போப் பிரான்சிஸ் (88) காலமானதை அடுத்து, சிகாகோவைச் சேர்ந்த ராபர்ட் ஃபிரான்சிஸ் பிரிவோஸ்ட் (69) புதிய போப்பாகத் தேர்ந்தெடுக்கப்பட்டார். வட அமெரிக்காவில் இருந்து தேர்ந்தெடுக்கப்பட்ட முதல் போப் இவர். காலநிலை மாற்றம் குறித்து மிகுந்த அக்கறை காட்டும் இவர், வாட்டிகனை கார்பன் சமநிலை நாடாக மாற்றவும் திட்டமிட்டுள்ளார்.
ஓபன் ஏஐ ராஜா: செயற்கை நுண்ணறிவு (ஏஐ) தொழில்நுட்ப வளர்ச்சியில் முக்கியப் பங்காற்றியவர் சாம் ஆல்ட்மேன். ஓபன் ஏஐ நிறுவனத்தை எலான் மஸ்க்குடன் இணைந்து 2015இல் தொடங்கினார்.
உலகளாவிய கவனத்தை ஈர்த்துவரும் ஏஐ தளங்களான சாட் ஜிபிடி, டால் - ஈ ஆகியவை இவரது ஓபன் ஏஐ நிறுவனத்தில் வடிவமைக்கப்பட்டவை. ‘வர்ள்ட்’ என அறியப்படும் ‘வர்ள்ட் காயின்’ கிரிப்டோகரன்சி திட்டம், பசுமை ஆற்றல் தொடர்பான ‘ஹீலியன் எனெர்ஜி’ நிறுவனம் போன்றவற்றிலும் முக்கிய முதலீட்டாளர்.
