நவீன மருத்துவம் நகரும் தடங்கள் ஆண்டுதோறும் மாறிக்கொண்டே வருகின்றன. 2023இல் மரபணு மாற்றுச் சிகிச்சை முறைகள் மகத்துவம் பெற்றன என்றால், 2024இல் ஸ்டெம் செல் சிகிச்சைகள் வீறுகொண்டு எழுந்துள்ளன.
இதுவரை விலங்கினங்களில் மட்டுமே பெரிதும் மேற்கொள்ளப்பட்டு வந்த இவ்வகை சிகிச்சை முறைகளை, மனிதரிடமும் மேற்கொள்ள ஆய்வாளர்கள் முனைந்தனர். அதன் முக்கிய வெற்றியாக, சீனாவில் முதலாம் வகைச் சர்க்கரை நோயால் பாதிக்கப்பட்டிருந்த 25 வயது நிரம்பிய பெண்ணுக்கு ஸ்டெம் செல் சிகிச்சை மூலம் நிரந்தரத் தீர்வைக் கொடுத்தனர்.
செயற்கை நுண்ணறிவு: செயற்கை நுண்ணறிவும் இயந்திரக் கற்றலும் மருத்துவத் துறையை மறுவடிவமைப்பு செய்யக்கூடிய அளவுக்கு வளர்ந்திருக்கின்றன. இவை மனித நோய்க்கணிப்பை எளிதாக்குகின்றன; விரைவான, துல்லியமான முடிவுகளை வழங்குகின்றன; சிகிச்சையைத் துல்லியமாகத் தேர்ந்தெடுப்பதிலும் மருத்துவர்களுக்கு உதவுகின்றன. சிகிச்சைக்கான காத்திருப்புக் காலமும், மருத்துவ மனித வளமும் இவற்றால் குறைந்து வருகின்றன. மொத்தத்தில், நோயாளிகளின் உடல்நலப் பாதுகாப்பை இவை குறுகிய காலத்தில் பெரிதும் மேம்படுத்துகின்றன.
புதுமை புகுத்தும் 3-டி அச்சு: இப்போது ‘முப்பரிமாண அச்சுத் தொழில்நுட்பம்’ (3D printing technology) மருத்துவத் துறையில் பெரும் புரட்சியை ஏற்படுத்திவருகிறது. பயனாளிக்குத் தேவையான உள்பதியங்கள் (Implants), செயற்கை உறுப்புகள் (Prosthetics), உயிரி உறுப்புகள் (Bionic Organs) ஆகியவற்றை உருவாக்குவதை இது சாத்தியமாக்கியுள்ளது. உயிர்காக்கும் சிகிச்சைகள் தேவைப்படும் நோயாளிகளுக்குப் புதிய நம்பிக்கையை அளிக்கிறது.
தனிப்பட்டவரின் தேவைகளுக்கு ஏற்றவாறு உறுப்புகளைச் செயற்கையாக வடிவமைக்கவும் இது உதவுகிறது. உதாரணமாக, தீக்காயத்தால் பாதிக்கப்பட்டவர்களுக்கு முப்பரிமாண முறையில் அச்சிடப்பட்ட தோல் விரைவாகவும் முழுதாகவும் தீர்வு தருகிறது. பட்டாசு விபத்துகள் மலிந்துள்ள நாட்டினருக்கு இது பெரிதும் பலனளிக்கும்; உறுப்பு மாற்று அறுவைச்சிகிச்சையையும் அதற்கான காத்திருப்புக் காலத்தையும் குறைத்துவிடும்.
ரோபாட் அறுவைச்சிகிச்சை: அறுவைச்சிகிச்சையின் துல்லியத்தை மேம்படுத்துவதன் மூலம் பயனாளிக்கு வலி மேலாண்மை சிகிச்சைகளும் அவற்றுக்கான தேவைகளும் குறைகின்றன. அந்த வகையில் மருத்துவத் துறையில் புகுந்துள்ள ரோபாட் அறுவைசிகிச்சை முறை மிக முக்கியமானது.
குறிப்பாக, பொது அறுவைசிகிச்சையின்போது மேற்கொள்ளப்படும் உடல் கீறல்களை ரோபாட்கள் பெரிதும் குறைத்துவிடுகின்றன; சிகிச்சைச் செயல்பாடுகளையும் எளிதாக்கிவிடுகின்றன; மருத்துவமனையில் நோயாளிகள் அனுமதிக்கப்படும் காலத்தைக் குறைத்துவிடுகின்றன. பாதிப்பிலிருந்து மீண்டவர்களுக்கு ஊனமோ, உறுப்புக் குறைபாடோ, நிலையான பாதிப்போ ஏற்படுவதில்லை. இவர்களின் மறுவாழ்வு எப்போதும்போல் தரமாகவும் இருக்கிறது.
‘அணிகலன்’ தொழில்நுட்பம்! - உடலில் நகைகள் அணிவதுபோல் அணியக்கூடிய தொழில்நுட்பக் கருவிகளின் (Wearable technology) பயன்பாடும் தற்போது அதிகரித்துவருகிறது. இந்த நவீனக் கருவிகள் இதயத் துடிப்பு, ரத்தச் சர்க்கரை அளவுகள், உறக்கம் போன்றவற்றைக் கண்காணிக்கின்றன. இவை சுகாதார மேலாண்மைக்கான தரவுகளை உடனுக்குடன் மருத்துவர்களுக்கு வழங்கும் சிறு ஆய்வகங்களாகச் செயல்படுகின்றன.
பயனாளிகள் மருத்துவமனையில் அனுமதிக்கப்படாமல், வெளியில் இருந்துகொண்டே மேற்கொள்ளப்படும் இந்தத் தொடர்ச்சியான கண்காணிப்பு முறைகள், மனிதருக்கு ஏற்படும் ஆரோக்கியப் பிரச்சினைகளை முன்கூட்டியே கண்டறிய உதவுகின்றன; நோய்த் தடுப்பு நடைமுறைகளையும் எளிதாக்குகின்றன.
சவால்கள் என்னென்ன? - ‘நவீனத் தொழில்நுட்பத்தால் மருத்துவத் துறை மேம்பட்டுவரும் சகாப்தம் இது’ என்பதைச் சுகாதாரப் பாதுகாப்பின் அற்புதமான இந்த முன்னேற்றங்கள் காட்டுகின்றன. மருத்துவத் துறை தொழில்நுட்ப ரீதியில் வேகமாக வளர்ச்சி அடைவதால், திறமையான நிபுணர்களுக்கான தேவையும் அதிகரிக்கிறது.
இந்த நவீனக் கருவிகளின் செயல்பாடுகளுக்குத் திறமையான மேலாண்மை மிகவும் முக்கியமானது. காரணம், மருத்துவத் துறையானது மனித உயிர் தொடர்பானது. அரசின் கொள்கை வகுப்பாளர்கள் இதைக் கருத்தில்கொண்டு, இதற்கான புதிய திட்டங்களை வரையறுக்க வேண்டும்.
‘எதிர்உயிரிக்கு எதிர்ப்பாற்றல்’! - உலகளவில் கோவிட் -19 பெருந்தொற்றைக் கட்டுப்படுத்திவிட்டாலும், காசநோய், மலேரியா, டெங்கு போன்ற வழக்கமான தொற்றுநோய்களைக் கட்டுப்படுத்துவது பெரிய சவாலாகவே உள்ளது. இதற்கு முக்கியக் காரணம் ‘எதிர்உயிரிக்கு எதிர்ப்பாற்றல்’ (Antimicrobial Resistance - AMR) என அறியப்பட்டுள்ளது.
உலகில் ஆண்டுதோறும் 50 லட்சம் பேர் இதன் காரணமாகவே உயிரிழக்கின்றனர். இந்த இறப்புகளில் ஐந்தில் ஒரு பங்கு இந்தியாவில் மட்டும் நிகழ்கிறது. இந்தப் பிரச்சினையைத் தீர்க்க வேண்டுமானால், பயனுள்ள புதிய சிகிச்சைகளை உருவாக்கி, மக்கள் அவற்றை எளிதில் அணுகுவதை உறுதிப்படுத்துவதாகும்.
மேலும், நாட்டில் எதிர்உயிரி மருந்துகளைப் பயன்படுத்தும் வழிகளில் குறிப்பாக, மக்கள் சுயமருத்துவம் மேற்கொள்ளும் போக்குகளில், புதிய சட்ட திட்டங்கள் கொண்டுவரப்பட வேண்டும். அவற்றைப் பொதுச் சமூகமும் ஏற்றுக்கொள்ள முன்வர வேண்டும். சமீபத்தில் கேரளம் இதற்கான முன்னெடுப்பை மேற்கொண்டிருப்பதை இங்கு நினைவுகூரலாம்.
மேலும், உலகளாவிய ஆன்டிபயாடிக் ஆராய்ச்சி - மேம்பாட்டுக் கூட்டமைப்பானது (The Global Antibiotic Research & Development Partnership - GARDP) இந்திய மருத்துவ ஆராய்ச்சிக் கழகம், இந்திய மருந்து நிறுவனங்கள் - உற்பத்தியாளர்களுடன் கூட்டு சேர்ந்து இந்தியாவுக்குள் இதற்கான ஆய்வுகளை மேற்கொண்டுவருகிறது.
முதியோர் நலப் பாதிப்பு: தற்போதுள்ள இந்திய மக்கள்தொகையில் 8.6% பேர் முதியவர்கள் (சுமார் 13.5 கோடி பேர்). 2050இல் இது 40% ஆக அதிகரிக்கும் என்கிறது ஒரு தேசியப் புள்ளிவிவரம். இவர்களுக்கு உயர் ரத்தஅழுத்தம், நீரிழிவு, இதயநோய், புற்றுநோய் உள்ளிட்ட தொற்றாநோய்களின் சுமையும், சிகிச்சைச் செலவுகளும் அதிகரிக்கின்றன. ஏறத்தாழ 75% குடும்பங்கள் தங்கள் சொந்தப் பணத்தில்தான் சிகிச்சை எடுத்துக்கொள்கின்றனர்.
நிதி ஆயோக் அமைப்பின் சமீபத்திய ஆய்வறிக்கையின்படி, அதிகரிக்கும் சுகாதாரச் செலவினங்களால் ஆண்டுதோறும் 7% மக்கள் (சுமார் 10 கோடி பேர்) வறுமைக்கோட்டுக்குக் கீழே தள்ளப்படுகின்றனர். இதனால் சிகிச்சை முழுமை பெறாமல் உயிரிழப்புகள் ஏற்படுகின்றன.
ஆயுஷ்மான் பாரத் திட்டத்தின் கீழ் 70 வயதுக்கு மேற்பட்டவர்களுக்கு ‘ஏபி பிஎம் – ஜெய்’ எனும் புதிய மருத்துவக் காப்பீடு வழங்குவதற்கு மத்திய அரசு ஏற்பாடு செய்துள்ளது. இது முதியோரின் ஆரோக்கியப் பிரச்சினைகளை முழுவதுமாகத் தீர்க்கப் போவதில்லை என்றும் கருதப்படுகிறது.
நோய் வரவிடாமல் தடுக்கும் முயற்சிகள்தான் அரசின் மருத்துவச் செலவுகளைக் குறைக்கும். ஆகவே, முதியோரிடம் காணப்படும் நோய்கள் குறித்த விழிப்புணர்வை மக்களிடம் அதிகப்படுத்தவும், இவற்றை ஆரம்பநிலையிலேயே கண்டறிந்து சிகிச்சை அளிக்கவும், தடுப்பதற்கான வழிகளைக் காட்டவும், நாட்டில் ஆரம்பச் சுகாதார நிலையங்களின் மருத்துவக் கட்டமைப்புகளைச் சீர்ப்படுத்த வேண்டியது அவசியமாகிறது.
பெருகி வரும் மனநலப் பாதிப்பு - கடந்த சில ஆண்டுகளில் மக்களின் மனநலமும் உலகளவில் கவலைக்குரியதாக மாறியுள்ளது. கோவிட் – 19 தொற்றுநோயால் தூண்டப்பட்ட அழுத்தங்கள், பெருகிவரும் சமூகத் தனிமை, பொருளாதார நிச்சயமற்ற தன்மை ஆகியவை மனநலப் பிரச்சினைகளை மக்களிடம் அதிகப்படுத்தியுள்ளன.
மனநலத்தின் அவசியத்தைப் பொதுவெளியில் மக்களுக்குப் புரியவைப்பது, பொது ஆரோக்கியத்தில் மனநலம் ஏற்படுத்துகிற பாதிப்புகளைத் தீர்ப்பது, மனநலச் சுகாதாரச் சேவைகளையும் அவற்றுடனான அணுகுமுறைகளையும் அதிகரிப்பது, மனநலத்தை முதன்மைச் சுகாதாரப் பராமரிப்பில் ஒருங்கிணைப்பது ஆகியவை இன்றைய அவசரத் தேவைகள்.
தேவை: கூட்டு அணுகுமுறை! - 2025இல் உலகளாவிய சுகாதாரச் சவால்களைச் சமாளிப்பதற்கு ஒரு கூட்டு அணுகுமுறை தேவைப்படுகிறது. சுகாதார அமைப்புகளை வலுப்படுத்தவும், சுகாதாரச் சமத்துவத்தை மேம்படுத்தவும் அனைத்துத் தரப்பினரும் இணைந்து பணியாற்ற வேண்டும். இதற்குத் தேசிய அளவில், சுகாதாரத்துக்கான அரசாங்கச் செலவினம், மொத்த உள்நாட்டு உற்பத்தியில் (GDP) தற்போதுள்ள 2 சதவீதத்திலிருந்து குறைந்தபட்சம் 5 சதவீதமாக அதிகரிக்கப்பட வேண்டும்.
- தொடர்புக்கு: gganesan95@gmail.com