அமெரிக்காவுக்குப் போன நந்தன்!

சிதம்பரம் போகாமல் இருப்பேனோ - என் ஜென்மத்தை வீணாக்கி கெடுப்பேனோ?நாடறிந்த நந்தனாரின் இந்தப் பாடலின் ஏக்கத்தையும் இயலாமையையும் கேட்டு உருகாதார் உண்டோ? நந்தனாகவே அமெரிக்கா சென்று நந்தன் கதையை அமெரிக்காவில் அரங்கேற்றி திரும்பி இருக்கிறார் திருபுவனம் ஆத்மநாதன். நல்ல சாரீர வளமும் நடிப்பாற்றலும் இயற்கையாகவே ஆத்மநாதனுக்கு வாய்த்திருக்கிறது..“நந்தனைப் போல ஏர்பூட்டி உழுகின்ற விவசாயக் குடும்பத்தில் பிறந்தவன் நான். ஆனால் என் தாத்தா கண்ணுசாமி மண்கொண்டார் ஆர்மோனியம் வாசிக்கும்போது என்னை பக்கத்தில் உட்கார வைத்துக் கொள்வார். பெரிய தாத்தா ரத்தினசாமி மண்கொண்டார் கஞ்சிரா வாசிப்பார். சொக்கையா ஆசாரியார் ஒருவர் மோர்சிங் வாசிப்பார். வேறு வேறு தொழில் செய்தாலும் இசையால் ஒன்று சேர்ந்த இவர்களோடு நான் வளர்ந்தேன். பிறகு போழக்குடி கணேசய்யரிடம் முறையாக சங்கீதம் கற்றுக் கொண்டேன். பள்ளி வகுப்பில் ஒரு பக்கக் கட்டுரையை மனப்பாடம் செய்ய முடியாமல் தடுமாறுவேன். ஆனால் என் ஆசான் போழக்குடி கணேசய்யர் சொல்லித்தரும் முக்கால் மணி நேர தீட்சிதர் கீர்த்தனையை, கேட்டவுடன் ஒப்பிப்பேன். விரும்பிச் செய்தால் எந்த வித்தையும் கைவசமாகும்’’ என்கிறார் ஆத்மநாதன்.எண்பதுகளில் நந்தன் கதையை தஞ்சாவூர் தமிழ்ப் பல்கலைக்கழக துணைவேந்தர் முன்னிலையில் அரண்மனை வளாகத் திறந்த வெளியில் அரங்கேற்றிக் காட்டினார் நாடகத் துறையில் விரிவுரையாளராகப் பணிபுரிந்த ராஜூ. அப்போது ஆத்மநாதன் இளைஞர். வெற்றுடம்பில் இடுப்புவரை கட்டிய வேட்டி, இரு கைகளையும் உடம்பை மறைக்கும் மேல் துண்டாக்கி கட்டிக்கொண்டு, கண்கள் இடுங்க, நெஞ்சு சதைகள் பணிவின் இலக்கணமாய் குலுங்கி நடுங்க அல்ல நடிக்க - ஏறத்தாழ நாற்பது வருடங்களுக்கு பின்னரும் நந்தன் அப்படியேதான் இருக்கிறார்..“பித்தம் தெளிய மருந்தொன்றிருக்குதுபேரின்ப மன்றுள்ளேமற்ற மருந்துகள் தின்றாலும்உள்ளுக்கு வல்லே வல்லே!ஐயேன் அடிமை…….”என்று பாடிக் காட்டினார் ஆத்மநாதன். அதே பாவம், அதே குரல். ஜிப்பாவும் வேஷ்டியும் மறைந்து அதே நந்தன். அமெரிக்கா செல்லும்போதெல்லாம் விமான நிலையம் வரும் தமிழர்கள், விமான நிலையத்திலிருந்து இறங்கும்போதே “அதோ நந்தன்! அதோ நந்தன்!’’ என்று ஆரவாரிப்பார்களாம். “அது நந்தனுக்கான அங்கீகாரம்” என்று கண்ணைத் துடைத்துக் கொண்டார் ஆத்மநாதன்.தமிழ்ப் பல்கலைக்கழக நாடகத் துறை விரிவுரையாளர் ராஜூவுக்கு, புதுதில்லி சங்கீத நாடக அகாடமி, ஆன்மீக இலக்கியமும் செவ்வியல் இலக்கியமும் ஒன்றிணையும் நவீன நாடகமொன்றை அரங்கேற்ற நல்கை வழங்கியது. இந்திரா பார்த்தசாரதி எழுதிய நந்தன் கதையை ராஜூ தேர்ந்தெடுத்தார்..வழக்கிலிருந்த நந்தனார் கதை வடிவத்தில் சில மாற்றங்கள் செய்தார். நந்தனின் கட்கத்தில் சுருட்டிய துண்டைத் தோளுக்கு மாற்றினார். நந்தனின் உண்மையான ஆன்மீக ஈடுபாட்டை விரும்பாத சில சக்திகளின் போலிவேடத்தை புரிந்து கொள்ளாத நந்தன், அக்கினியில் பிரவேசிக்க நேர்கிறது. அங்கே அவனை மாலைபோட்டு வரவேற்க சிவபெருமான் வரவில்லை. தீயில் கருகி நந்தனும் அவன் நண்பர்கள் சிலரும் மாண்டு போகிறார்கள். தப்பித்தவர்கள் திரும்பி வந்து நடந்ததைக் கூற, புதிய நந்தன் கதை தொடர்கிறது என்பதாக ராஜூவின் நாடகம் முடியும்.நவீன நாடகம் குறித்த புரிதலும் சமூக அக்கறையும் கொண்ட ராஜூவின் நந்தன் கதை நாடகம் தமிழ்நாடு முழுவதும் அரங்கேறியபோது. சர்ச்சைகளும் எழுந்தன. “1986இல் நான் நந்தனாக நடிக்க ஆரம்பித்தவுடன் என் நிகழ்ச்சிகளை ஏற்பாடு செய்தவர்கள் ரத்து செய்துவிட்டனர். பல நிகழ்ச்சிகளுக்கு ஒரு குறிப்பிட்ட சமூகத்தினர் வருவதை நிறுத்திக் கொண்டனர். பொதுவெளியில் சாதியைச் சொல்லிப் பாடுவதாக சர்ச்சைகள் எழுந்தன. வாழ்க்கையே போராட்டமாகி விட்டது. நந்தன் நாடக நிகழ்ச்சிகளை நான் விடாமல் நடத்தினேன். இன்று அதே நந்தன் கதை என்னை வாழ்வில் உயர வைத்திருக்கிறது” என்கிறார் ஆத்மநாதன்..நந்தன் நாடக ஆக்கத்தில் நாடகத்துறைப் பேராசிரியர் மு.ராமசாமியும் இணைப்பேராசிரியர் முருகேசனும் துணை நின்றனர்.திருபுவனம் ஆத்மநாதன் நந்தனாக நடிப்பதோடு நின்றுவிடாமல், மூன்று ஆதிதிராவிட வகுப்பைச்சேர்ந்த சிறுவர்களுக்கு இசை பயிற்றுவித்து, அவர்களில் இருவர் இசை ஆசிரியர்களாக பணியாற்றுகின்றனர். மூவருமே இசைக்கச்சேரி செய்து வருவதாகக் கூறுகிறார்.

அமெரிக்காவுக்குப் போன நந்தன்!

அதிகம் வாசித்தவை...