சமகாலத் தமிழ் எழுத்தாளர் களில் குறிப்பிடத்தகுந்தவர் அ.முத்துலிங்கம். அவரது சிறுகதைகள் சிலவற்றைத் தேர்ந்தெடுத்து, “என்னுடைய அனுபவங்களை யாராலும் திருட முடியாது” என்ற முத்துலிங்கத்தின் கூற்றையே தலைப்பாக்கியிருக்கிறார் தொகுப்பாசிரியர் அருள்செல்வன்.
வெவ்வேறு புவியியல் பின்புலங்களில் புலம்பெயர் அனுபவங்களைப் பதிவுசெய்திருக்கும் கதைகளையே அவர் இத்தொகுப்புக்காகத் தேர்வு செய் திருக்கிறார். வெவ்வேறு நாடுகளைக் களமாகக் கொண்ட ஒவ்வொரு கதையிலும் யாரேனும் ஒருவர் புலம்பெயர்ந்தவராக இருக்கிறார். கதை சொல்லியும் புலம்பெயர்ந்தவர் எனும் நிலையில், ஒரே கதைக்குள் பல்வேறு அனுபவங்கள் ஏற்படுகின்றன.
பெரும் துயரம் சுமந்த வாழ்க்கையை, எட்ட நின்று வேடிக்கை பார்ப்பவரின் பொருத்தமற்ற பகடியையும் முத்துலிங்கம் மறைக்காமல் முன்வைக்கிறார். அதேபோல், யூதாஸ் தற்கொலை செய்துகொண்ட மரத்தின் இலைகள் நடுங்குவதையும், பணிந்து வாழ்ந்தே பழகிய மனிதரின் கைகள் நடுங்கு வதையும் இணைத்துப் பார்க்கிறார்.
இத்தொகுப்பின் ஒவ்வொரு கதையையும் படிக்கும்போது புலம்பெயர்வது என்பது என்ன? எல்லா புலம்பெயர்வும் ஒரே தன்மையிலானதா? அவர்கள் சுமக்கும் அனுபவங்களின் கனம் ஒன்றா? அவர்கள் பின்பற்றும் சடங்குகள் வெறும் மதத்தின்பாற்பட்டவையா? வீட்டை விட்டு வெளியே வருவதில்லை என்பதற்குப் பின்னால் உள்ள வரலாறு என்ன? இப்படிப் பல கேள்விகள் வாசகர்களுக்குள் எழும். அவற்றுக்கான பதில்களைக் கதைக்குள்ளேயே கண்டடையத் தூண்டுகிறார் ஆசிரியர்.
முத்துலிங்கத்தின் மொழியாளுமை நிச்சயம் பிரமிக்க வைக்கும். ஏதோ ஒரு நாட்டில் ஓடும் ஏதோ ஒரு நதியைக் கூட, ‘லராமி ஆறுதானே, நம்மூர் வழியாத்தான் ஓடுது’ என்ற தன்மையில் நம்முள் கடத்திவிடுகிறார்.
மொழிபெயர்ப்பு கதைகளுக்கும், புலம்பெயர் கதைகளுக்கும் உள்ள வேறுபாடு அவற்றின் உணர்வு வெளிப்பாடுகள்தாம். எழுத்தாளர், வாசகர் இருதரப்பு வெளிப்பாடுகளையும் சேர்த்தே குறிப்பிடுகிறேன். காட்டின் நினைவுகளைச் சுமந்துகொண்டு இரவில் கூக்குரல் எழுப்பும் சர்க்கஸ் விலங்கின் மொழி தெரிந்தவர்கள் உலாவும் தொகுப்பு இந்நூல்.
அ.முத்துலிங்கத்தின் ‘திருடமுடியாத கதைகள்’
தொகுப்பாசிரியர்: அருள்செல்வன்
காலச்சுவடு பதிப்பகம்
விலை: ரூ.320
தொடர்புக்கு: 04652 278525
- sivarajbharathi.s@hindutamil.co.in
