

கல்வி என்பது காலத்துக்கேற்ப மேம்பட வேண்டும். அனைத்துத் தரப்பு மாணவர்களும் மேம்பட்ட கல்வியைப் பெறுவதற்கான கொள்கைகள் அனைத்தையும் உள்ளடக்கியதாக உருவாக்கப்பட வேண்டும்.
ஆனால், அறிவிக்கப்பட்ட நாளில் இருந்தே பல்வேறு சர்ச்சைகளை எதிர்கொண்டு வருகிறது இந்தியாவின் புதிய கல்விக் கொள்கை. கல்விக் கொள்கைகளும் கொள்கையை உருவாக்கும் குழுக்களும் நமக்குப் புதிதல்ல.
ராதாகிருஷ்ணன் ஆணையம் (பல்கலைக்கழக கல்வி ஆணையம்), லக் ஷ்மணசாமி முதலியார் ஆணையம் (இடைநிலைக் கல்வி ஆணையம்), கோத்தாரி ஆணையம் (தேசிய கல்வி ஆணையம்), புதிய கல்விக் கொள்கை (1986) போன்றவற்றோடு பெண் கல்விக்காக துர்காபாஷ் தேஷ்முக் தலைமையில் அமைக்கப்பட்ட தேசியக் குழு (1958), ராமமூர்த்தி குழு (1990), யஷ்பால் குழு (1993, 2009) உள்ளிட்ட குழுக்களும் இந்தியாவின் கல்விக் கொள்கையை வடிவமைத்ததில் பங்காற்றியுள்ளன.