அமெரிக்கா சுதந்திரம் அடைந்து 250 ஆண்டுகள் ஆகியுள்ளன. அமெரிக்காவில் அடிமை முறையை எதிர்த்துப் போராடி அமெரிக்க வளர்ச்சியின் அங்கம் நாங்கள் என உலகறிய வெற்றிக்கொடி நாட்டியவர்கள் கறுப்பினத்தவர்கள்.
அவர்கள் வரலாறு எழுதப்படாமல் அமெரிக்காவின் வரலாற்றை எழுதிவிடமுடியாது. ‘புதிய கறுப்பர்கள்’ என்ற இந்த நூல் நியூயார்க் அருகே ‘ஹார்லெம்’ என்ற இடத்தில் ஏற்பட்ட ஒரு புதிய மறுமலர்ச்சி காலத்தின் ஆழ அகலங்களை அலசுகிறது.
அதில் முக்கிய பங்காற்றியவர்களை நினைவுகூரும்விதமாக தேர்ந்தெடுக்கப்பட்ட கட்டுரைகள் இந்நூலில் வெளியிடப்பட்டுள்ளன. அமெரிக்காவின் தென்மாநிலங்களில் அடிமைகளாக வாழ்ந்த கறுப்பினத்தவர்கள் புதியதாக தோன்றிய ரயில் போக்குவரத்தின் வாயிலாக வடமாநிலங்களை நோக்கி புதிய வாழ்வை எதிர்நோக்கி இடம்பெயர்ந்தனர்.
அவ்வகையில் சிகாகோ, ஒக்லஹோமா, நியூயார்க்கை நோக்கி அவர்கள் இடம்பெயர்ந்தது ‘தி கிரேட் மைக்ரேஷன்’ என்று அழைக்கப்படுகிறது. நியூயார்க்கில் ‘ஹார்லெம்’ என்ற பகுதிக்கு கறுப்பினத்தவர்கள் பெருமளவில் வந்து குடியேறத் தொடங்கினர். அவ்வகையில் ‘ஹார்லெம்’ வீதிகளில்தான் தனது வாழ்க்கையை மால்கம் எக்ஸ் தொடங்கினார் என்பதும் இந்நூலில் உள்ள ஓர் அரிய செய்தியாகும்.
