மரபிலக்கியம், நவீன இலக்கியம், இயக்க அரசியல் என மூன்று பகுதிகளாகப் பிரிக்கப்பட்ட முப்பத்தெட்டுக் கட்டுரைகள் இந்நூலுக்குள் உள்ளன. இந்நூலை எழுதிய ப.பத்மினி ஒரு தமிழ்ப் பேராசிரியர். இவருக்கென்று ஓர் அரசியல் பார்வை இருக்கிறது.
அது பெண்ணியம், தலித்தியம் போன்ற விளிம்புநிலையின் அரசியல் சார்ந்ததாக இருக்கிறது. அவர் சங்க இலக்கியம் குறித்து எழுதினாலும் நவீன இலக்கியம் குறித்து எழுதினாலும் இந்த இரண்டு பார்வைகளும் மிக வலுவாக வெளிப்பட்டிருப்பதை நூல் முழுக்கப் பார்க்க முடிகிறது.
சங்க இலக்கியத்தின்மீது இவருக்குச் சில போதாமைகள் இருக்கின்றன. அதனை மீள் வாசிப்புச் செய்கிறார். அதற்கு நவீன இலக்கியக் கருதுகோள்கள் துணை புரிந்திருக்கின்றன. குறிப்பாகச் சங்கப் பெண்கவிஞர்கள் குறித்து எழுதப்பட்டுள்ள கட்டுரைகள் புதிய வாசிப்புகளைத் திறந்துவிடுகின்றன.
