மனிதரின் வாழ்வு, சுதந்திரம் மற்றும் தனிப்பட்ட தேடல்களை ஆராய்கிற தத்துவ வடிவம்தான் இருத்தலியம். மனிதன் முதலில் பிறக்கிறான், பின் தனது செயல்பாடுகளின் ஊடே வாழ்வின் அர்த்தத்தைத் தேடிக் கண்டடைகிறான்.
இங்ஙனம் மனித இருப்புக்கான காரணமும் அதற்கான முக்கியத்துவமுமே இருத்தலியக் கோட்பாட்டின் மூலநோக்கங்களாக விளங்குகின்றன. அந்த வகையில் இருத்தலியத் தத்துவச் சாரங்கள் எங்ஙனம் புனைவாக்கம் பெற்றிருக்கின்றன என்பனவற்றை விளக்கக்கூடிய அல்புனைவு நூல்தான் எழுத்தாளர் சீமானம்பலத்தின் ‘இருத்தலியம்: கோட்பாடும் புனைவும்’.
இருத்தலியம் சுயம்புவாகத் தோன்றி விடவில்லை. மாறாக இதற்கு முன்னும் பின்னுமாய்த் தொடர்புடைய பல சிந்தனைப் போக்குகளும் மரபுகளும் உள்ளன என்பதனைச் சுட்டிக்காட்டி, இருத்தலியம் குறித்த விளக்கங்கள், கீர்க்கெகார்ட், நீட்சே, சார்த்தர் முதலிய இருத்தலியலாளர்களின் வரையறைகள் ஆகியவற்றை எடுத்துக்காட்டுவதாய் ‘இருத்தலியமும் இருத்தலியலாளர்களும்’ என்கிற முதல் கட்டுரை அமைந்திருக்கிறது.
