

வரலாறுகள் எப்போதும் வியப்பூட்டுபவை. பார்க்கிற இடங்களில், நடக்கிற தடங்களில் வரலாற்றின் எச்சங்கள், தங்கள் ரத்தம் மறைத்தபடி புதைந்து கிடக்கின்றன.
அதன் பின்னணியில் இருக்கிற வரலாறுகள், ரசனையோடு எழுதப்படும்போது -அது கற்பனையாக இருந்தாலும் உயிர் கொண்டதாகவே ஆகி விடுகிறது. அப்படியொரு நாவலாக வெளிவந்திருக்கிறது ‘ஆயிரத்தளி நந்திவர்மன்’.
தமிழகத்தில் பல்லவர்கள், 550 ஆண்டுகள் ஆட்சி செய்ததாகச் சொல்கிறார்கள் வரலாற்றாசிரியர்கள். கி.பி.8ஆம் நூற்றாண்டில் காஞ்சிபுரம் கைலாசநாதர் கோயிலைக் கட்டிய ராஜசிம்மன் மறைந்ததும் அவனுடைய மகன்களான மகேந்திரவர்ம பல்லவனும் பரமேஸ்வரனும் அடுத்தடுத்தப் போர்களில் வீரமரணம் அடைவதால், வாரிசின்றித் தவிக்கிறது பல்லவ தேசம்.