பத்திரிகையாளர் சூரியசந்திரன் 1993-2006 காலகட்டங்களில் பல ஆளுமைகளைச் சந்தித்துப் பேட்டி கண்டிருக்கிறார். பிரபல கவிஞர்கள், நாவலாசிரியர்கள், கலை, இலக்கிய விமர்சகர்கள், திறனாய்வாளர்கள், ஓவியர்கள், தெருக்கூத்துக் கலைஞர்கள், பொம்மலாட்டக் கலைஞர்கள் எனப் பலரும் இதில் இடம்பெற்றுள்ளனர்.
‘50 நேர்பேச்சுகள்’ தொகுப்பில் சூரிய சந்திரன் உரையாடிய ஆளுமைகளாக சுரதா, அப்துல் ரகுமான், அறிவுமதி என ஓர் அழகான வரிசை தொடங்குகிறது.
இவ்வரிசையில் எம்.வி.வெங்கட்ராம், நகுலன், பிரபஞ்சன், பா.ஜெயப்பிரகாசம், இன்குலாப், சு.சமுத்திரம், கனிமொழி, திலகவதி, பாமா, சிவகாமி, கந்தர்வன், பூமணி, இந்திரன், தேனுகா, ச.தமிழ்ச்செல்வன், திலீப்குமார் உள்ளிட்ட ஐம்பது கலைஇலக்கிய ஆளுமைகள் இடம்பெற்றுள்ளனர்.
பெண் எழுத்து, தலித் எழுத்து, இலங்கை எழுத்து இவற்றோடு மரபார்ந்த தமிழ் உணர்வு, இடதுசாரியக் கொள்கைகள், திராவிட ஆதரவு எழுத்துக்கள், நவீனத்துவ இலக்கியம் எனப் பல்வகைச் சிந்தனைப் போக்குகளின் பரந்தவெளியாக இந்நூல் அமைந்துள்ளது.
