ஜப்பானிய எழுத்தாளர் சாவ் இச்சிகாவா எழுதிய ‘Hunchback’ நாவல், 2025ஆம் ஆண்டின் சர்வதேச புக்கர் பரிசுக்கான நெடும்பட்டியலில் இடம்பெற்றிருந்தது. ‘கூன் முதுகு’ எனப் பொருள்படும்படி அமைந்த இந்த நாவல், உடல் குறைபாடு கொண்டவர்களின் உடல் தேவைகளையும் பாலியல் விருப்பங்களையும் பற்றிப் பேசுகிறது.
இந்த நாவலை எழுதிய இச்சிகாவா, பிறவிக் குறைபாடு கொண்டவர். தசைச் சிதைவு நோயால் பாதிக்கப்பட்ட இவர், சக்கர நாற்காலியிலும் சுவாசக் கருவிகளோடும் தன் வாழ்நாளைக் கழிக்கிறார். உடல் குறைபாடு காரணமாக எந்தப் பணிக்கும் போக முடியாத சூழலில் எழுத்தாளராகும் முடிவை 20 வயதில் எடுத்தார்.