தொடுகறி: ஜி.அசோகனின் இலக்கிய எச்சரிக்கை

‘குடும்ப நாவல்’ வரிசையில் ஜி.நாகராஜன், அசோகமித்திரன், சுந்தர ராமசாமி, பூமணி, ஹெப்ஸிபா ஜேசுதாசன் போன்றோரின் நாவல்களை மலிவுப் பதிப்பாக வெளியிட்டு அசத்தியவர் ஜி.அசோகன். அந்த வரிசையில் ப. சிங்காரத்தின் ‘புயலிலே ஒரு தோணி’ நாவலை ஒரு எச்சரிக்கையோடு வெளியிட்டிருக்கிறார்: ‘பொழுது போகவில்லை, தூக்கம் வரவில்லை, அதற்காகப் படிக்கிறேன்… என்பவர்கள் தயவுசெய்து இதைப் படிக்க வேண்டாம். தமிழ் நவீன உலகின் சிறந்த இலக்கியப் படைப்புகளை அறிந்துகொள்ள அல்ல புரிந்துகொள்ள விரும்புவர்கள் மட்டுமே படிக்கவும். தமிழை நேசி! தமிழை வாசி!’

டிசம்பர் மாதம் வந்தால் கவிஞர் இன்குலாப் மறைந்து ஓராண்டு நிறைவடையப்போகிறது. அவரது நினைவு நாளையொட்டி அவருடைய படைப்புகள் அனைத்தையும் தொகுக்கும் பணியை இன்குலாப் அறக்கட்டளை செய்துவருகிறது. 1972-லிருந்து 2012 வரை இன்குலாபின் 10 கவிதைத் தொகுப்புகள் (அவ்வப்போதைய முழுத் தொகுப்புகள் உட்பட) வெளியாகியிருக்கின்றன. 2012-க்குப் பின்னர் அவர் எழுதி, தொகுப்படாத கவிதைகளையும் உள்ளடக்கி, இன்குலாபுக்கு உண்மையான அஞ்சலியாக இந்த முழுத் தொகுப்பு இருக்கும்.