மத்திய அமைச்சர் பிரகலாத் ஜோஷி
புதுடெல்லி: மத்திய கல்வி அமைச்சராக பிரகலாத் ஜோஷி நியமிக்கப்பட்டுள்ளார். அவருக்கு கூடுதல் பொறுப்பாக கல்வித்துறை வழங்கப்பட்டுள்ளது.
சிஜேபி போராட்டத்தின் எதிரொலியாக, மத்திய கல்வி அமைச்சர் பொறுப்பில் இருந்து விலகுவதாக தர்மேந்திர பிரதான் இன்று (சனிக்கிழமை) அறிவித்தார். அவரது ராஜினாமாவை குடியரசுத் தலைவர் திரவுபதி முர்மு ஏற்றுக் கொண்டார்.
இந்தச் சூழலில், மத்திய அமைச்சர் பிரகலாத் ஜோஷிக்கு கூடுதல் பொறுப்பாக கல்வித் துறை ஒதுக்கீடு செய்யப்பட்டுள்ளது. பிரதமர் மோடியின் பரிந்துரையை ஏற்று இந்த அறிவிப்பை குடியரசுத் தலைவர் திரவுபதி முர்மு வெளியிட்டுள்ளார்.
தற்போது மத்திய நுகர்வோர் நலன், உணவு, பொது விநியோகத் துறை அமைச்சராக உள்ள பிரகலாத் ஜோஷி, கூடுதல் பொறுப்பாக கல்வித் துறையை கவனிக்க உள்ளார்.
யார் இந்த பிரகலாத் ஜோஷி?
63 வயதான பிரகலாத் ஜோஷி, கர்நாடக மாநிலத்தை சேர்ந்தவர். தார்வாட் மக்களவை தொகுதியின் உறுப்பினராக உள்ளார். மத்திய அமைச்சராக பல்வேறு துறைகளில் பணியாற்றிய அனுபவம் கொண்டவர். தற்போது கல்வித் துறை அவருக்கு கூடுதல் பொறுப்பாக ஒதுக்கப்பட்டுள்ளது. வினாத்தாள் கசிவு, தேர்வு முறைகேடு, கல்வி சீர்திருத்தம் என பல்வேறு சவால்களை இத்துறை எதிர்கொண்டுள்ள நிலையில் இந்தப் பொறுப்பை அவருக்கு வழங்கப்பட்டுள்ளது.
முன்னதாக, நீட் தேர்வு வினாத்தாள் கசிவு மற்றும் தேர்வு முறைகேடுகளுக்கு கண்டனம் தெரிவித்தும், இந்த முறைகேடுகளுக்கு தார்மிகப் பொறுப்பேற்று மத்திய கல்வி அமைச்சர் தர்மேந்திர பிரதான் ராஜினாமா செய்ய வேண்டும் என்று வலியுறுத்தியும் கரப்பான்பூச்சி ஜனதா கட்சி (சிஜேபி), டெல்லி ஜந்தர் மந்தரில் கடந்த ஜூன் 28-ம் தேதி போராட்டத்தை தொடங்கியது.
இந்நிலையில், கடந்த 20-ம் தேதி சிஜேபி கட்சி சார்பில் நாடாளுமன்றம் நோக்கி பேரணி நடத்தப்பட்டது. இதில் ஏராளமான மாணவர்கள் பங்கேற்றனர். மாணவர்களை கலைக்க டெல்லி போலீஸார் தடியடி நடத்தி, கண்ணீர் புகைக்குண்டுகளை வீசினர். இதில் சிலர் காயமடைந்தனர்.
இந்நிலையில், தேசம் முழுவதும் உள்ள பல்வேறு மாநிலங்களிலும் நீட் தேர்வுக்கு எதிராக மாணவர்கள், இளைஞர் அமைப்பினர் போராட்டத்தில் ஈடுபட்டனர். இதன் தொடர்ச்சியாக, மத்திய அரசு - சிஜேபி இடையிலான பேச்சுவார்த்தைக்குப் பின் தர்மேந்திர பிரதான் பதவி விலகியது குறிப்பிடத்தக்கது.
