புதுடெல்லி: டெல்லி ஜந்தர் மந்தரில் நாளை (அக்.10) போராட்டம் நடத்த கரப்பான்பூச்சி ஜனதா கட்சி அழைப்பு விடுத்துள்ளதை அடுத்து, மாநகரில் பாதுகாப்பு தீவிரப்படுத்தப்பட்டுள்ளது. மேலும், பொதுப் போக்குவரத்துக்கான கட்டுப்பாடுகளை டெல்லி காவல் துறை அதிகரித்துள்ளது.
வினாத்தாள் கசிவுக்கு பொறுப்பேற்று தர்மேந்திர பிரதான் பதவி விலக வலியுறுத்தி டெல்லி ஜந்தர் மந்தரில் சிஜேபி கடந்த ஜூலை மாதம் போராட்டம் நடத்தியது. போராட்டம் தீவிரமடைந்ததன் காரணமாக மத்திய கல்வி அமைச்சர் பதவியில் இருந்து தர்மேந்திர பிரதான் பதவி விலகினார்.
இதேபோல், தலைமைத் தேர்தல் ஆணையர் ஞானேஷ் குமார் பதவி விலக வலியுறுத்தி டெல்லி ஜந்தர் மந்தரில் நாளை போராட்டம் நடத்த கரப்பான்பூச்சி ஜனதா கட்சியும் (சிஜேபி), சிபிஐ (எம்எல்)-ன் மாணவர் அமைப்பான ஏஐஎஸ்ஏ-வும் இணைந்து அழைப்பு விடுத்துள்ளன.
மேலும், இந்த போராட்டத்துக்கு பாரதிய கிசான் சங்கம் எனும் விவசாயிகள் அமைப்பு ஆதரவு தெரிவித்துள்ளது. எதிர்க்கட்சிகளின் ஆதரவும் இந்தப் போராட்டத்துக்கு இருக்கும் என்பதால், டெல்லியில் பரபரப்பு அதிகரித்துள்ளது.
இந்தப் போராட்டத்துக்கு டெல்லி காவல் துறை அனுமதி அளிக்கவில்லை. மேலும், ஜந்தர் மந்தரில் போராட்டம் நடத்த தடை விதிக்கப்பட்டுள்ளது. தடையை மீறி போராட்டம் நடத்த முயல்பவர்களை கைது செய்ய காவல்துறை திட்டமிட்டுள்ளது. இதற்காக, மத்திய ஆயுதக் காவல் படைகளின் 221 படைப்பிரிவுகளைச் சேர்ந்த 23,000 வீரர்கள் களமிறக்கப்பட்டுள்ளனர். இதற்கான நடவடிக்கையை மத்திய உள்துறை அமைச்சகம் எடுத்துள்ளது. இவர்கள், டெல்லி போலீஸாரோடு இணைந்து பணியாற்ற உள்ளனர்.
அதோடு, போராட்டக் களத்துக்கு வருபவர்களை வழியிலேயே தடுத்து நிறுத்தி அவர்களை தடுப்பு மையங்களுக்குக் கொண்டு செல்வதற்காக 10 தற்காலிக தடுப்பு மையங்கள் அமைக்கப்பட்டுள்ளன.
டெல்லிக்கு வெளியில் இருந்து போராட்டக்காரர்கள் டெல்லிக்குள் நுழைவதைத் தடுக்கும் நோக்கில், பொதுப்போக்குவரத்து கட்டுப்படுத்தப்பட்டுள்ளது. ரயில் சேவைகளை குறிப்பிட்ட நேரத்துக்கு நிறுத்த அல்லது குறைக்கவும், ஓலா, உபெர் போன்ற செயலி வழி இயங்கும் டாகஸிகளின் இயக்கத்தை கட்டுப்படுத்தவும் காவல்துறை அறிவுறுத்தல்களை வழங்கி உள்ளதாக தகவல் வெளியாகி உள்ளது.
மேலும், ஹோட்டல்கள், விருந்தினர் இல்லங்கள் உள்ளிட்ட தங்கும் இடங்கள் குறிப்பிட்ட காலத்துக்கு மூடப்பட்டிருக்க வேண்டும் அல்லது புதிய முன்பதிவுகளை நிறுத்த வேண்டும் என்று டெல்லி காவல் துறை அறிவுறுத்தியுள்ளது. மதுபானக் கடைகள் இன்றும் நாளையும் மூடப்பட டெல்லி அரசு உத்தரவிட்டுள்ளது. தேவையைப் பொருத்து இணையக் கட்டுப்பாடுகளும் விதிக்கப்படலாம் என கூறப்படுகிறது. போராட்டம் நடைபெறாமல் தடுப்பதற்குத் தேவையான பல்வேறு நடவடிக்கைகளை காவல்துறை மேற்கொண்டு வருகிறது.
இந்நிலையில், டெல்லி காவல் துறையின் இந்த நடவடிக்கைக்கு சிஜேபி கடும் கண்டனம் தெரிவித்துள்ளது. இது குறித்து சிஜேபி இணை ஒருங்கிணைப்பாளர் ஆசுதோஷ் ரங்கா, தனது எக்ஸ் பக்கத்தில் வெளியிட்டுள்ள பதிவில், “மேலிட உத்தரவின்படியே நீங்கள் (டெல்லி காவல் துறை) இவ்வாறு செயல்படுகிறீர்கள் என்பது எங்களுக்குத் தெரியும். ஆனால், நமது குழந்தைகளின் மீது தாக்குதல் நடத்த எப்படி உங்களால் முடிகிறது?
நீங்கள் என்ன செய்தாலும் நாங்கள் நாளை ஜந்தர் மந்தரை நிச்சயம் சென்றடைவோம். நாட்டைக் காப்பதற்கான அந்த வரலாற்றுச் சிறப்புமிக்கப் போராட்டத்தை நாங்கள் முன்னெடுப்போம். வரலாறு உங்களை எவ்வாறு மதிப்பிடும் என்பதை நீங்கள் சிந்தித்துப் பார்க்க வேண்டும்” என தெரிவித்துள்ளார்.
