யோகி ஆதித்யநாத் | கோப்புப் படம்
புதுடெல்லி: பிழைப்பிற்காக உத்தரப் பிரதேசத்தை விட்டுச் சென்றவர்கள் தம் மாநிலத்திற்கு திரும்புவதாக அம்மாநில அரசின் தரப்பில் தெரிவிக்கப்பட்டுள்ளது. உ.பி.யில் வேலைவாய்ப்பு, முதலீடு மற்றும் சமூகப் பாதுகாப்பு உள்ளிட்டவை உயர்ந்துள்ளதே இதற்கு காரணம் எனவும் கூறியுள்ளது.
இது குறித்து உ.பி. அரசு தரப்பில் அதன் உயர் அதிகாரிகள் செய்தியாளர்களிடம் நட்புரீதியான சந்திப்பின் போது கூறியிருப்பதாவது: கடந்த ஒன்பது ஆண்டுகளில், முதல்வர் யோகி ஆதித்யநாத் அரசின் கொள்கைகளின் தாக்கத்தை இப்போது நேரடியாகப் பார்க்க முடிகிறது.
முன்பு உ.பியின், இளைஞர்களும், தொழிலாளர்களும் வேலைவாய்ப்புக்காக மாநிலத்தை விட்டு வெளியேற வேண்டிய கட்டாயத்தில் இருந்தனர். ஆனால், அவர்களுக்கு தங்கள் வீடுகளுக்கு அருகிலேயே தற்போது போதுமான வேலைவாய்ப்புகள் கிடைக்கின்றன.
வேலைவாய்ப்பு, கல்வி, சுகாதாரம் மற்றும் பாதுகாப்புக்காக இடம்பெயர வேண்டிய கட்டாயம் இனி உ.பியில் இல்லை. முன்னதாக மாநிலத்தை விட்டு வெளியேறிய இளைஞர்களும், தொழிலாளர்களும் இப்போது திரும்பி வருகிறார்கள்.
இது, மாநிலத்தில் வளர்ச்சி, தன்னம்பிக்கை மற்றும் அனைவரையும் உள்ளடக்கிய செழிப்பு ஆகியவற்றின் ஒரு புதிய துவக்கம். கடந்த 9 ஆண்டுகளில், தொழில்துறை முதலீடு அதிகரித்து, குறு, சிறு மற்றும் நடுத்தர நிறுவனங்களின் விரிவாக்கம் அதிகரித்துள்ளது.
இதனால், வேலைவாய்ப்பு முகாம்கள் மற்றும் திறன் மேம்பாட்டுத் திட்டங்கள் மூலம் பெரிய அளவில் வேலைவாய்ப்புகள் உருவாக்கப்பட்டுள்ளன. வேலையின்மை விகிதத்தில் ஒரு வரலாற்றுச் சரிவு ஏற்பட்டுள்ளது.
லட்சக்கணக்கான இளைஞர்கள் அரசு மற்றும் தனியார் துறைகளில் வேலைவாய்ப்பு பெற்றுள்ளனர். வேலைவாய்ப்புத் துறையால் இயக்கப்படும் சேவா மித்ரா இணையதளத்தில் சுமார் 53,000 திறமையான தொழிலாளர்கள் பதிவு செய்யப்பட்டுள்ளனர்.
மேலும், அவர்கள் நேரடியாக வேலைவாய்ப்புடன் இணைக்கப்படுகிறார்கள். இன்வெஸ்ட் உபி, ஒற்றைச் சாளர அமைப்பு, வெளிப்படையான செயல்முறைகள் மற்றும் வணிகம் செய்வதை எளிதாக்குதல் சீர்திருத்தங்கள் ஆகியவை முதலீட்டாளர்களின் நம்பிக்கையை அதிகரித்துள்ளன.
விரைவுச்சாலை வலைப்பின்னல்கள், விமான நிலையங்கள், தொழில்துறை வழித்தடங்கள், பாதுகாப்பு உற்பத்தி வழித்தடங்கள், மருத்துவக் கல்லூரிகள் மற்றும் தளவாட மையங்கள் போன்ற உள்கட்டமைப்புத் திட்டங்கள் மாவட்டங்களுக்குத் தொழில்களைக் கொண்டு வந்துள்ளன.
வேலைவாய்ப்பு மற்றும் தொழிற்சாலைகளின் அடிப்படையில் உத்தரப் பிரதேசம் நாட்டின் முதல் மாநிலங்களில் ஒன்றாக உள்ளது, இதன் காரணமாக உள்ளூர் மட்டத்தில் நிரந்தர வேலைகள் உருவாக்கப்பட்டுள்ளன. தற்போது, மாநிலத்தில் சுமார் 30,000 தொழிற்சாலைகள் இயங்கி வருகின்றன, இதன் எண்ணிக்கை 2017 வரை அதில் பாதியாகக் கூட இருந்ததில்லை.
கடந்த ஒன்பது ஆண்டுகளில், இளைஞர்கள், தொழிலாளர்கள் மற்றும் பெண்களுக்கு அவர்களின் சொந்த மாவட்டங்களில் வேலைவாய்ப்புக்கான எண்ணிக்கை பல மடங்கு அதிகரித்துள்ளது.
உத்தரப் பிரதேச அரசு வேலைவாய்ப்பை வழங்கியது மட்டுமல்லாமல், தொழிலாளர்கள் மற்றும் அவர்களது குடும்பத்தினரின் பாதுகாப்பு, கல்வி மற்றும் எதிர்காலத்திற்கும் முன்னுரிமை அளித்துள்ளது. இவ்வாறு அவர்கள் தெர்வித்தனர்.
