புதுடெல்லி: இந்திய கடற்படைக்குச் சொந்தமான ‘ஐஎன்எஸ் பெட்வா’ போர்க் கப்பலை நவீனமயமாக்குவதற்காக, கொச்சின் ஷிப்யார்டு நிறுவனத்துடன், பாதுகாப்பு அமைச்சகம் ரூ.498.58 கோடி மதிப்பிலான ஒப்பந்தம் செய்துள்ளது.
டெல்லியில் பாதுகாப்புத் துறைச் செயலர் ராஜேஷ் குமார் சிங் முன்னிலையில் நேற்று இந்த ஒப்பந்தம் கையெழுத்தானது. இதன்படி, இந்திய கடற்படையின் பிரம்மபுத்ரா ரக போர்க் கப்பலான ஐஎன்எஸ் பெட்வாவில் முக்கியமான தொழில்நுட்ப மாற்றங்கள் மேற்கொள்ளப்பட உள்ளன. இதன்படி, தற்போது கப்பலில் பயன்படுத்தப்படும் நீராவி மூலம் இயங்கும் உந்துவிசை அமைப்பு அகற்றப்பட்டு, அதற்குப் பதிலாக டீசல் என்ஜின் அடிப்படையிலான புதிய உந்துவிசை அமைப்பு பொருத்தப்படும்.
இந்தத் திட்டம் இந்தியாவின் கப்பல் பழுதுபார்ப்பு மற்றும் பராமரிப்புத் துறையில் உள்நாட்டுத் தொழில்நுட்பத் திறன்களை மேலும் வலுப்படுத்தும்.
குறிப்பாக, சிக்கலான உந்துவிசை அமைப்புகளை மாற்றுதல் மற்றும் கடற்படைக் கப்பல்களை நவீனமயமாக்குதல் போன்ற பணிகளை மேற்கொள்ளும் திறன் அதிகரிக்கும். இந்தத் திட்டத்தில் 50-க்கும் மேற்பட்ட குறு, சிறு மற்றும் நடுத்தர நிறுவனங்கள் (எம்எஸ்எம்இ) பங்கேற்கும் என எதிர்பார்க்கப்படுகிறது.
பிரளய் ஏவுகணை சோதனை
ஒடிசாவில் உள்ள டாக்டர் ஏ.பி.ஜே.அப்துல் கலாம் தீவில் இருந்து கடந்த 5-ம் தேதி பிரளய் ஏவுகணையை பாதுகாப்பு ஆராய்ச்சி மற்றும் மேம்பாட்டு அமைப்பு (டிஆர்டிஒ) வெற்றிகரமாகப் பரிசோதித்தது. இந்த சோதனையின் அனைத்து இலக்குகளும் வெற்றிகரமாக எட்டப்பட்டன. சந்திப்பூரில் உள்ள ஒருங்கிணைந்த சோதனை மையம் சார்பில், நிறுவப்பட்டிருந்த கண்காணிப்புக் கருவிகள் பதிவு செய்த தரவுகள் மூலம் இதை உறுதி செய்ததாக பாதுகாப்பு அமைச்சகம் தெரிவித்துள்ளது.