திருமலை: திருமலையில் தொடர் மழை, பனிமூட்டம் காரணமாக திருப்பதி மலைப்பாதைகளில் வாகன ஓட்டிகள் மிகவும் பாதுகாப்பாக வாகனத்தை செலுத்த வேண்டுமென திருமலை திருப்பதி தேவஸ்தானம் பக்தர்களுக்கு எச்சரிக்கை விடுத்துள்ளது.
திருமலையில் கருட சேவை முதல் தொடர்ந்து மழை பெய்து வந்தது. குறிப்பாக, கடந்த 2 நாட்களாக திருப்பதி, திருமலையில் கன மழை பெய்ய தொடங்கி விட்டது. இதன் காரணமாக நீர்நிலைகளுக்கு நீர் வரத்து அதிகரித்துள்ளது. வெப்பம் தணிந்து மலைப்பகுதிகளில் குளிர் நிலவுவதால் திருமலை முழுவதும் பனிமூட்டம் அதிகமாக காணப்படுகிறது.
காலை வேளைகளிலும், மாலை வேளைகளிலும் திருமலையே பனியால் மூடிக்கொள்கிறது. இதனால் திருப்பதி-திருமலை இடையே வாகன ஓட்டிகள் பாதை சரிவர தெரியாமல் அவதிக்குள்ளாகி வருகின்றனர். ஆதலால், மலைப்பாதைகளில் செல்லும் வாகன ஓட்டிகள் போக்குவரத்து நிபந்தனைகளை கடைப்பிடித்து, மெதுவாக செல்லவும் என்றும், முன்னால் செல்லும் வாகனங்களை வேகமாக முந்தி செல்ல முயற்சிக்க வேண்டாமென்றும் திருப்பதி தேவஸ்தானம் எச்சரிக்கை விடுத்துள்ளது.
