புதுடெல்லி: அருணாச்சல பிரதேசம், சண்டிகர் உள்ளிட்ட மேலும் 6 மாநிலங்கள் மற்றும் யூனியன் பிரதேசங்களில் வாக்காளர் பட்டியல் சிறப்பு சுருக்கத் திருத்தப் பணி (எஸ்எஸ்ஆர்) மேற்கொள்ளப்படும் என தேர்தல் ஆணையம் அறிவித்துள்ளது.
புதிய வாக்காளர்கள் மற்றும் எஸ்ஐஆர்-ல் விடுபட்டவர்களை சேர்ப்பதற்காக, தமிழ்நாடு உட்பட 17 மாநிலங்கள் மற்றும் யூனியன் பிரதேசங்களில் வாக்காளர் பட்டியல் சிறப்பு சுருக்கத் திருத்தம் (எஸ்எஸ்ஆர்) மேற்கொள்ளப்படும் என கடந்த அக்டோபர் 15-ம் தேதி தேர்தல் ஆணையம் அறிவித்தது.
இந்நிலையில், 2-ம் கட்டமாக அருணாச்சல பிரதேசம், மிசோரம், ஒடிசா, சிக்கிம் ஆகிய 4 மாநிலங்கள் மற்றும் சண்டிகர், தாத்ரா நாகர் ஹவேலி & டாமன் - டையூ, ஆகிய 2 யூனியன் பிரதேசங்களில் எஸ்எஸ்ஆர் பணி நடைபெறும் என தேர்தல் ஆணையம் அறிவித்துள்ளது.
தேர்தல் ஆணையம் அறிவித்துள்ள அட்டவணையின்படி, இந்தப் பணிகள் நவம்பர் 20-ம் தேதி முடிவடையும். வரைவு வாக்காளர் பட்டியல் நவம்பர் 30-ம் தேதி வெளியிடப்படும். டிசம்பர் 30-க்குள் வாக்காளர்கள் தங்கள் ஆட்சேபங்களை தெரிவிக்கலாம். இதன் அடிப்படையில் இறுதிப் பட்டியல் 2027 ஜனவரி 21-ம் தேதி வெளியிடத் திட்டமிடப்பட்டுள்ளது. இப்பணியை வெற்றிகரமாக முடிக்க சம்பந்தப்பட்ட மாநில தலைமைச் செயலாளர்களுக்கு உத்தரவிடப்பட்டுள்ளது.
