புதுடெல்லி: டெல்லியில் காற்று மாசுபாட்டை கட்டுப்படுத்த அரசு நடவடிக்கை எடுக்க வேண்டும் என்று காங்கிரஸ் மூத்த தலைவர் சோனியா காந்தி வலியுறுத்தினார்.
டெல்லி காற்று மாசுபாடு பிரச்சினை தொடர்பாக நாடாளுமன்ற வளாகத்தில் பல்வேறு எதிர்க்கட்சிகளின் தலைவர்கள் நேற்று போராட்டத்தில் ஈடுபட்டனர். பிரதமர் வெறும் அறிக்கை வெளியிடுவதை தவிர்க்க வேண்டும், இந்த விவகாரத்தில் உரிய நடவடிக்கை எடுக்க வேண்டும் என அவர்கள் வலியுறுத்தினர். பிரச்சினையின் தீவிரத்தை எடுத்துக்காட்டும் வகையில் சில எம்.பி.க்கள் முகக்கவசம் அணிந்திருந்தனர்.
போராட்டத்தை தொடர்ந்து, காங்கிரஸ் நாடாளுமன்ற கட்சியின் தலைவர் சோனியா காந்தி கூறுகையில், “டெல்லியில் காற்று மாசுபாடு மிக மோசம் அடைந்துள்ளது. அதை கட்டுப்படுத்த உரிய நடவடிக்கை எடுப்பது அரசின் பொறுப்பாகும். இந்தப் பிரச்சினையால் குழந்தைகளும் முதியவர்களும் மிகவும் பாதிக்கப்பட்டுள்ளனர்” என்றார்.
காங்கிரஸ் பொதுச் செயலாளர் பிரியங்கா காந்தி வதேரா கூறுகையில், “காற்று மாசுபாடு அரசியல் விவகாரம் அல்ல. அரசு உறுதியான நடவடிக்கை எடுக்க வேண்டும். அதற்கு நாங்கள் உறுதுணையாக இருப்போம்” என்றார். காங்கிரஸ் தேசிய தலைவர் மல்லிகார்ஜுன கார்கே உள்ளிட்ட பலர் போராட்டத்தில் பங்கேற்றனர்.
