வாராணசி: கர்நாடக சங்கீத மும்மூர்த்திகளுள் ஒருவரான ஸ்ரீமுத்து சுவாமி தீட்சிதரின் 250-வது அவதாரத் திருநாளை முன்னிட்டு, அவரது உருவம் பொறித்த ரூ.250 மதிப்புள்ள சிறப்பு நினைவு நாணயத்தை மத்திய நிதி அமைச்சர் நிர்மலா சீதாராமன் நேற்று முன்தினம் வெளியிட்டார்.
உ.பி. மாநிலம் வாராணசியில் உள்ள பனாரஸ் இந்து பல்கலைக்கழகத்தின் சார்பில் ஏற்பாடு செய்யப்பட்டிருந்த விழாவில் இந்தச் சிறப்பு நாணயம் வெளியிடப்பட்டது. இதில் நிர்மலா சீதாராமன் பேசும்போது, ‘‘இந்திய பாரம்பரிய இசைக்கும், நம் நாட்டின் ஆன்மிக பண்பாட்டு பாரம்பரியத்துக்கும் முத்துசுவாமி தீட்சிதர் ஆற்றிய பங்களிப்பு அளப்பரியது” என்றார்.
கர்நாடக சங்கீதத்தின் மும்மூர்த்திகளாக ஸ்ரீதியாகராஜர், முத்துசுவாமி தீட்சிதர் மற்றும் சியாமா சாஸ்திரிகள் போற்றப்படுகின்றனர். பிரதானமாக சம்ஸ்கிருத மொழியில் இயற்றப்பட்ட தீட்சிதரின் சாகித்தியங்கள், பக்தி, இந்திய தத்துவம் மற்றும் ராக இலக்கணங்களின் சரியான கலவையாகத் திகழ்கின்றன.
சுமார் 450 முதல் 500 கீர்த்தனைகளை இவர் இயற்றியுள்ளார். வலைதள விவரங்களின்படி முத்துசுவாமி தீட்சிதரின் இந்த ரூ.250 சிறப்பு நினைவு நாணயத்தின் விலை ரூ.6,985 என நிர்ணயிக்கப்பட்டுள்ளது. 238 நாணயங்கள் இருப்பில் உள்ள தாகவும் தெரிவிக்கப்பட்டுள்ளது.
