ராஞ்சி / புதுடெல்லி: ஜார்க்கண்ட் மாநில அரசால் கொண்டுவரப்பட்ட புதிய வேலைவாய்ப்பு, தேர்வு விதிமுறைகளுக்கு எதிராக மாணவர்கள் நடத்தி வரும் போராட்டம் தீவிரமடைந்துள்ளது.
இப் பிரச்சினைக்குத் தீர்வு காண மாநில அரசுக்கும், மாணவர் பிரதிநிதிகளுக்கும் இடையே நடைபெற்ற 6-ம் சுற்றுப் பேச்சுவார்த்தை தோல்வியில் முடிவடைந்தது. இதனிடையே, மாணவர்களின் போராட்டத்துக்கு அகில இந்திய காங்கிரஸ் கமிட்டித் தலைவர் மல்லிகார்ஜுன கார்கே தனது முழு ஆதரவைத் தெரிவித்துள்ளார்.
ஜார்க்கண்ட் மாநில அரசுத் துறை தேர்வுகளில் வெளிப்படைத்தன்மையை உறுதி செய்ய வேண்டும், தேர்வு முறைகேடுகளைத் தடுக்க வேண்டும் மற்றும் உள்ளூர்வாசிகளுக்கு முன்னுரிமை அளிக்கும் வகையில் வேலைவாய்ப்புக் கொள்கைகளில் திருத்தம் கொண்டு வர வேண்டும், வினாத்தாள் கசிவு குறித்து சிபிஐ விசாரணை நடத்த வேண்டும் என்பன உள்ளிட்ட பல்வேறு கோரிக்கைகளை வலியுறுத்தி மாணவர்கள் தொடர் போராட்டங்களில் ஈடுபட்டு வருகின்றனர்.
இப்பிரச்சினை குறித்து விவாதிக்க மாநில அரசின் உயர் மட்டக் குழுவினர் மற்றும் மாணவர் அமைப்புகளின் பிரதிநிதிகள் இடையே ராஞ்சியில் 6-வது சுற்று பேச்சுவார்த்தை நடைபெற்றது. ஒருமித்த கருத்து எட்டப்படாததால், இந்த சந்திப்பும் எவ்வித தீர்வும் இன்றி தோல்வியில் நிறைவடைந்தது.
காங்கிரஸ் ஆதரவு
அகில இந்திய காங்கிரஸ் தலைவர் மல்லிகார்ஜுன கார்கே வெளியிட்டுள்ள அறிக்கையில்,‘‘இளைஞர்களின் எதிர்காலத்தைப் பாதிக்கும் வகையிலான கொள்கைகளை மாநில அரசுகள் திரும்பப் பெற வேண்டும். மாணவர்களின் குரலுக்கு அரசு செவிசாய்க்க வேண்டும். மாணவர்களின் இந்த அறப்போராட்டத்துக்கு காங்கிரஸ் கட்சி எப்போதும் துணையாக இருக்கும்,’’ என்று தெரிவித்துள்ளார்.
போராட்டத்தின் பின்னணி
கடந்த சில மாதங்களாகவே ஜார்க்கண்ட் மாநிலத்தில் அரசுப் பணியாளர் தேர்வாணையம் (ஜேபிஎஸ்சி) மற்றும் ஊழியர் தேர்வு வாரியம் (ஜேஎஸ்எஸ்சி) மூலம் நடத்தப்படும் தேர்வுகளில் முறைகேடுகள் நடப்பதாகக் கூறி மாணவர்கள் போராடி வருகின்றனர். அரசு தரப்பில் ஏற்கெனவே ஐந்து முறை பேச்சுவார்த்தை நடத்தப்பட்ட போதிலும், மாணவர்களின் முக்கியக் கோரிக்கைகள் ஏற்கப்படவில்லை.
இதனால் மாநிலம் தழுவிய அளவில் போராட்டங்கள் தீவிரமடைந்து வருகின்றன. மாணவர்கள் அமைப்பினருடன் ஜார்க்கண்ட் அமைச்சர் சுதிவ்யா குமார் நேற்று பேச்சுவார்த்தை நடத்தினார். இதையடுத்து, தேர்வுகள் தொடர்பாக விசாரிக்க ஓய்வுபெற்ற உயர் நீதிமன்ற தலைமையில் ஒரு குழுவை அமைக்க ஜார்க்கண்ட் அரசு முடிவு செய்திருப்பதாக அமைச்சர் சுதிவ்யா தெரிவித்தார்.ஜார்க்கண்ட் அரசுப் பணியாளர் தேர்வாணையத்தைச் சேர்ந்த 3 உறுப்பினர்களுக்கு சிஐடி சம்மன் அனுப்பியது. இதைத் தொடர்ந்து அவர்கள் மூன்று பேரின் ராஜினாமாவையும் ஆளுநர் ஏற்றுக் கொண்டுள்ளார்.
