பெங்களூரு: பெங்களூரு ராஜாஜிநகரைச் சேர்ந்த வாடகை கார் ஓட்டுநர் இந்துசேகர் (52), குடும்பத் தகராறில் மனைவி சுனிதா (40) மற்றும் அவரது குடும்பத்தினர் 6 பேரைக் கொடூரமாகக் கொலை செய்த சம்பவம் பெரும் அதிர்ச்சியை ஏற்படுத்தியுள்ளது.
2006-ல் திருமணம் செய்த இவர்களுக்கிடையே அடிக்கடி சண்டை நடந்துள்ளது. சுனிதாவின் தாயும் சகோதரர்கள் உள்ளிட்ட அனைவரும் குடும்ப விவகாரங்களில் தலையிட்டதால் இந்துசேகர் கோபமடைந்துள்ளார். அக்டோபர் 16-ம் தேதி சுனிதாவை ஆட்டுக்கல்லால் அடித்துக் கொன்று, உடலை நகருக்கு வெளியே வீசியுள்ளார். பின்னர் மைத்துனர்கள் சிவகுமார் (42), சங்கர் (36) ஆகியோருக்கு மதுவுடன் கறி விருந்து வைத்து, உரலால் அடித்துக் கொன்றார்.
அவர்களின் மனைவிகள் திவ்யா (36), நளினி (32), மாமியார் ரூபாவதி (65), 7 வயது சிறுவன் புனீத் ஆகியோரையும் கொலை செய்து, உடல்களை சார்மாடி, நந்தி மலைப் பகுதிகளில் வீசியுள்ளார். உறவினர்கள் அடுத்தடுத்து காணாமல் போனதால், நளினியின் தாய் லட்சுமி ஸ்ரீராம்புரா காவல் நிலையத்தில் புகார் அளித்தார்.
செல்போன் அழைப்புகளை ஆய்வு செய்த போலீஸார், இந்துசேகரைப் பிடித்து 24 மணி நேரம் விசாரித்தனர். அவர் குற்றத்தை ஒப்புக்கொண்டார். நந்தி மலையில் சிறுவனின் உடல் மீட்கப்பட்டது. மற்ற உடல்களை மோப்ப நாய், ட்ரோன் உதவியுடன் தேடி வருகின்றனர். கொலைக்குப் பயன்படுத்திய கார், ஆட்டுக்கல், ஆயுதங்கள் பறிமுதல் செய்யப்பட்டுள்ளன.
