திருப்பதி: திருப்பதி தேவஸ்தானத்தின் கட்டுப்பாட்டில் உள்ள ஸ்ரீ கல்யாண வெங்கடேஸ்வரர் கோயிலுக்கு ஹைதராபாத்தைச் சேர்ந்த பக்தர்கள் தங்க முலாம் பூசப்பட்ட புதிய யானை மற்றும் சிம்ம வாகனங்களை நேற்று நன்கொடையாக வழங்கினர்.
திருமலை திருப்பதி தேவஸ்தான பராமரிப்பில் உள்ள ஸ்ரீநிவாச மங்காபுரம் கல்யாண வெங்கடேஸ்வரர் கோயில் மிகவும் பிரசித்தமானது. இந்நிலையில், ஹைதராபாத்தைச் சேர்ந்த லட்சுமி ரெட்டி மற்றும் திவ்யா பிரியங்கா ஆகிய பக்தர்கள், ரூ.40 லட்சத்தில் தயாரிக்கப்பட்ட தங்க முலாம் பூசிய யானை மற்றும் சிம்ம வாகனங்களை கல்யாண வெங்கடேஸ்வரர் கோயிலின் துணை நிர்வாக அதிகாரி வரலட்சுமியிடம் நேற்று ஒப்படைத்தனர்.
இந்த வாகனங்களுக்கு நேற்று சிறப்பு பூஜைகள் நடத்தப்பட்டன. இவை இக்கோயிலில் நடைபெறவுள்ள பிரம்மோற்சவ விழாவில் உபயோகப்படுத்தப்படும் என தேவஸ்தான அதிகாரிகள் தெரிவித்துள்ளனர். இந்நிகழ்ச்சியில் உதவி நிர்வாக அதிகாரி கோபிநாத், கண்காணிப்பாளர் ராஜ்குமார், அர்ச்சகர்கள் மற்றும் அதிகாரிகள் பங்கேற்றனர்.
