புதுடெல்லி: அரசு தலைமைப் பொறுப்பில் 25 ஆண்டுகள் நிறைவு செய்ததையொட்டி நடைபெற்ற ‘விக்சித் பாரத் சங்கல்ப் சபா’ நிகழ்ச்சியில் பேசிய பிரதமர் மோடி ‘என்னை எதிர்த்தவர்களே ஜனநாயகத்தின் சக்தியை எனக்குக் கற்றுக்கொடுத்தார்கள்’ என தெரிவித்தார்.
நரேந்திர மோடி கடந்த 2001-ம் ஆண்டு அக்டோபர் 7-ம் தேதி முதன்முறையாக குஜராத் முதல்வராக பதவியேற்றார். தொடர்ந்து, 13 ஆண்டுகள் குஜராத் முதல்வராக பணியாற்றிய அவர், 2014-ம் ஆண்டு மே 26-ம் தேதி நாட்டின் பிரதமராக பதவியேற்றார். நேற்றுடன் அவர் அரசு தலைமைப் பொறுப்பில் 25 ஆண்டுகளை நிறைவு செய்தார். இதையொட்டி டெல்லியில் நடைபெற்ற ‘விக்சித் பாரத் சங்கல்ப் சபா’ நிகழ்ச்சியில் பிரதமர் மோடி கலந்துகொண்டார். அவர் விழா மேடைக்கு வந்தபோது, மக்கள் அவர் மீது மலர்களை தூவியும், ‘பாரத் மாதா கி ஜெய்’ என்று முழக்கமிட்டும் வரவேற்றனர்.
இந்நிகழ்ச்சியில் பிரதமர் மோடி பேசியதாவது: இன்று, நான் அரசாங்கத் தலைவராகத் தொடர்ந்து பணியாற்றி 25 ஆண்டுகளை நிறைவு செய்துள்ளேன். இது மக்களின் ஆசி. நாட்டு மக்களுக்கு நான் தலைவணங்குகிறேன். 2001-ம் ஆண்டு அக்டோபர் 7-ம் தேதி, நான் குஜராத் முதல்வராகப் பதவியேற்றபோது, இந்த மைல்கல் எட்டப்படும் என்று நான் கற்பனை கூட செய்து பார்க்கவில்லை. எனது நாட்டுக்காக இன்னும் அதிக ஆற்றலுடன் பணியாற்றுவதற்கான வலிமையையும் திறனையும் எல்லாம்வல்ல இறைவன் எனக்கு வழங்க வேண்டும் என்பதே எனது பிரார்த்தனை.
கோடிக்கணக்கான நாட்டு மக்களின் நம்பிக்கையும், லட்சக்கணக்கான கட்சித் தொண்டர்களின் அயராத உழைப்புமே எனது மிகப்பெரிய பலமாக இருந்துள்ளன. எனக்குத் துணையாக நின்றவர்கள் நம்பிக்கையின் வலிமையைக் காட்டினார்கள். என்னை எதிர்த்தவர்களே ஜனநாயகத்தின் சக்தியை எனக்குக் கற்றுக்கொடுத்தார்கள்.
2047-க்குள் விக்ஸித் பாரத்
2047-க்குள் விக்ஸித் பாரத், ஆத்மநிர்பர் பாரத், உலகளாவிய உற்பத்தி மையம், ஒலிம்பிக் போட்டிகளை நடத்துதல், விண்வெளியில் காலடி எடுத்து வைத்தல் இவற்றையெல்லாம் நாம் சாதிப்போம். நான் எனது தனிப்பட்ட லட்சியத்துக்காக வாழாமல், நமது தேசத்துக்காக வாழ்ந்தவன். ஒருபோதும் தனிமையை உணர்ந்ததில்லை. இந்தியாவின் பண்பாட்டு ஆன்மாவின் பாதுகாவலர்களாக எண்ணற்ற தேசியத் தொண்டர்கள் உள்ளனர்.
நம் நாடு சந்தித்த பெரும் துயரங்களில் ஒன்று, அரசியலுக்காக, வாக்குகளின் அடிப்படையில் சமூகம் பிரிக்கப்பட்டதுதான். பிரச்சினை அனைவருக்கும் பொதுவானதாக இருந்தால், அதற்கான தீர்வும் அனைவருக்கும் பொதுவானதாக இருக்க வேண்டும். தகுதியான எவரும் விடுபடாமல் இருப்பது, யாருக்கும் அவர்களின் உரிமையான பலன்கள் மறுக்கப்படாமல் இருப்பது தான் முழுமையான ஆட்சி. அதுதான் மாற்றத்தின் உண்மையான கதை. இவ்வாறு நரேந்திர மோடி பேசினார்.
