பஞ்சாப்: பஞ்சாபில் இடைநீக்கம் செய்யப்பட்ட மூன்று ஆம் ஆத்மி எம்எல்ஏ.க்கள் நேற்று டெல்லியில் பாஜகவில் இணைந்தனர். 2027 சட்டப்பேரவைத் தேர்தலுக்கு முன்பு ஆளும் கட்சிக்கு இது புதிய பின்னடைவாக அமைந்துள்ளது.
பஞ்சாப் சட்டப்பேரவைக்கு அடுத்த ஆண்டு தேர்தல் நடைபெறவுள்ளது. அங்கு இப்போது பகவந்த் மான் தலைமையிலான ஆம் ஆத்மி ஆட்சி நடைபெறுகிறது. இந்நிலையில், அமிர்தசரஸ் வடக்கு தொகுதி எம்எல்ஏவும் முன்னாள் ஐபிஎஸ் அதிகாரியுமான குன்வர் விஜய் பிரதாப் சிங், சமனா தொகுதியின் சேதன் சிங் ஜவுராமாஜ்ரா, சனூர் தொகுதியின் ஹர்மீத் சிங் பதான்மாஜ்ரா ஆகியோர் டெல்லி பாஜக தலைமையகத்தில் நேற்று நடைபெற்ற நிகழ்ச்சியில் அக்கட்சியில் இணைந்தனர். கட்சி விரோத செயல்பாடுகளில் ஈடுபட்டதாக இவர்கள் மூவரும் ஏற்கெனவே ஆம் ஆத் மியிலிருந்து இடைநீக்கம் செய்யப்பட்டிருந்தனர்.
குன்வர் விஜய் பிரதாப் சிங் நேற்று காலை எம்எல்ஏ பதவியை ராஜினாமா செய்தார். மற்ற இருவரும் ஞாயிற்றுக்கிழமையே கட்சியிலிருந்து விலகியிருந்தனர். பாஜகவில் இணைந்த பிறகு குன்வர் விஜய் பிரதாப் சிங் பேசும்போது, “முதல்வர் பகவந்த் மான் பஞ்சாபை அழித்துவிட்டார். மாநிலத்தில் ஆம் ஆத்மி கட்சி முடிந்துவிட்டது. அர்விந்த் கேஜ்ரிவாலும் பகவந்த் மானும் சேர்ந்து அக்கட்சியை முடிவுக்குக் கொண்டு வந்துவிட்டனர். பஞ்சாபிலும் இரட்டை இன்ஜின் அரசு (பாஜக அரசு) அமையும்” என்றார்.
முன்னதாக, “போதைப்பொருள், மிரட்டிப் பணம் பறித்தல், ரவுடிசம், ஊழலில் சிக்கியுள்ள பஞ்சாபை மீட்டெடுக்க வேண்டும்” என்று எக்ஸ் தளத்தில் பதிவிட்டிருந்தார். அவரைத் தொடர்ந்து ஹர்மீத் சிங் பதான்மாஜ்ரா பேசும்போது, “போதையில் மிதக்கும் பஞ்சாப் என்ற நிலையிலிருந்து உயரும் பஞ்சாப் ஆக மாற்றவே பாஜகவில் இணைந்துள்ளோம்” என்றார்.
