புதுடெல்லி: பஞ்சாப் சட்டப்பேரவைக்கான 31 வேட்பாளர்கள் அடங்கிய 2-வது பட்டியலை ஆம் ஆத்மி கட்சி வெளியிட்டுள்ளது. இதன்மூலம், 71 வேட்பாளர்கள் அறிவிக்கப்பட்டுள்ளனர்.
பஞ்சாபில் 117 உறுப்பினர்களைக் கொண்ட சட்டப்பேரவைக்கு அடுத்த ஆண்டு பிப்ரவரியில் தேர்தல் நடைபெறும் என எதிர்பார்க்கப்படுகிறது. இதையொட்டி ஆளும் ஆம் ஆத்மி, காங்கிரஸ், பாஜக, சிரோமணி அகாலிதளம் உள்ளிட்ட கட்சிகள் வேட்பாளர்கள் தேர்வு உள்ளிட்ட பணிகளில் ஈடுபட்டுள்ளன.
இந்நிலையில், 40 வேட்பாளர்கள் அடங்கிய முதல் கட்ட பட்டியலை ஆம் ஆத்மி கட்சி கடந்த அக்டோபர் 31ம் தேதி வெளியிட்டது. இதனைத் தொடர்ந்து 31 வேட்பாளர்கள் அடங்கிய இரண்டாம் கட்ட பட்டியல் இன்று வெளியிடப்பட்டுள்ளது. ஆம் ஆத்மி கட்சியின் அரசியல் விவகாரக் குழு நடத்திய ஆலோசனைகளின் அடிப்படையில் இந்த பட்டியல் வெளியிடப்பட்டுள்ளதாக அக்கட்சி தெரிவித்துள்ளது.
முதற்கட்ட பட்டியலின்படி, முதல்வர் பகவந்த் மான், துரி தொகுதியில் மீண்டும் போட்டியிட உள்ளார். சபாநாயகர் குல்தார் சிங் சந்த்வான், கோட்கபுரா தொகுதியில் போட்டியிட உள்ளார். தற்போதைய பஞ்சாப் சட்டப்பேரவையில் ஆம் ஆத்மி கட்சிக்கு 94 உறுப்பினர்கள் உள்ளனர் என்பது குறிப்பிடத்தக்கது.
