புதுடெல்லி: வடமேற்கு டெல்லி, கஞ்சவாலா பகுதியில் கடந்த ஜனவரி 1-ம் தேதி அதிகாலை இரு சக்கர வாகனத்தில் சென்ற அஞ்சலி சிங் (20) என்ற இளம்பெண் மீது கார் மோதியது. இதில் அப்பெண் காருக்கு அடியில் சிக்கிய நிலையில் பல கி.மீ. தூரம் இழுத்துச் செல்லப்பட்டு உயிரிழந்தார்.
சிசிடிவி காட்சிகள்: இது தொடர்பான சிசிடிவி காட்சிகள் வெளியாகி அதிர்ச்சியை ஏற்படுத்தியது. இந்த வழக்கில் தீபக் கன்னா (26), அமித் கன்னா (25), கிருஷ்ணன் (27), மிதுன் (26), மனோஜ் மிட்டல் ஆகிய 5 பேரை டெல்லி போலீஸார் தொடக்கத்தில் கைது செய்தனர். 6-வது குற்றவாளி அசுதோஷ், கடந்த வெள்ளிக்கிழமை கைது செய்யப்பட்டு, 3 நாள் போலீஸ் காவலுக்கு அனுப்பப்பட்டார்.
இந்த 6 பேரும் டெல்லி ரோகிணி பகுதியில் உள்ள நீதிமன்றத்தில் நேற்று ஆஜர்படுத்தப் பட்டனர். இவர்களை 14 நாள் நீதிமன்ற காவலில் வைக்க நீதிமன்றம் உத்தரவிட்டது.
காருக்கு அடியில் பெண் சிக்கியது தெரிந்தே காரை செலுத்தியதாக போலீஸ் விசாரணையில் குற்றவாளிகள் ஒப்புக்கொண் டுள்ளதாக தெரியவந்துள்ளது.