Published : 04 Jan 2022 02:51 PM
Last Updated : 04 Jan 2022 02:51 PM

அதிகரிக்கும் கரோனா: டெல்லியில் வார இறுதி நாட்களில் ஊரடங்கு; பஞ்சாபில் இரவு ஊரடங்கு

புதுடெல்லி/ சண்டிகர்: டெல்லியில் கோவிட்-19 பரவுவதை கட்டுப்படுத்த டெல்லி பேரிடர் மேலாண்மை ஆணையம் வார இறுதி நாட்களில் ஊரடங்கு உத்தரவை விதிக்க முடிவு செய்துள்ளது. டெல்லி அரசு அலுவலக ஊழியர்கள் வீட்டிலிருந்து வேலை செய்ய வேண்டும் என்றும் தனியார் அலுவலகங்கள் வார இறுதி நாட்களில் 50 சதவீத திறனில் செயல்பட வேண்டும் எனவும் அறிவிக்கப்பட்டுள்ளது.

இந்தியாவில் கரோனா வைரஸ் பரவல் குறைந்து வந்த நிலையில் கடந்த சில வாரங்களாக அதிகரித்துவருகிறது. கடந்த அக்டோபர் மாதத்துக்குப்பின் தினசரி தொற்று 20 ஆயிரத்துக்குமேல் சென்றுள்ளது. இதில் கரோனா வைரஸின் உருமாற்றமான ஒமைக்ரான் வைரஸ் பரவலும் இருப்பதால் பரவல் அதிகரித்து வருகிறது.

டெல்லியில் கடந்த சில வாரங்களாகவே கரோனா வைரஸ் அதிகரித்து வருவதால், பல்வேறு கட்டுப்பாடுகளை டெல்லி அரசு விதித்துள்ளது. இரவுநேர ஊரடங்கு, பள்ளி,கல்லூரிகளுக்கு விடுமுறை ஆகியவற்றை அரசு அமல்படுத்தியுள்ளது.கடந்த 24 மணிநேரத்தில் டெல்லியில் புதிதாக 4,099 பேர் கரோனாவில் பாதிக்கப்பட்டனர். 10,986 பேர் சிகிச்சையில் இருக்கிறார்கள்.

டெல்லி முதல்வரும் ஆம்ஆத்மி கட்சியின் நிறுவனருமான அரவிந்த் கேஜ்ரிவாலுக்கு கரோனா தொற்று ஏற்பட்டுள்ளது. இந்நிலையில் டெல்லியில் கோவிட்-19 பரவுவதை கட்டுப்படுத்த டெல்லி பேரிடர் மேலாண்மை ஆணையம் வார இறுதி நாட்களில் ஊரடங்கு உத்தரவை விதிக்க முடிவு செய்துள்ளது.

டெல்லி துணை நிலை ஆளுநர் அனில் பைஜால் தலைமையில் நடைபெற்ற கூட்டத்திற்குப் பிறகு இந்த முடிவு எடுக்கப்பட்டது. டெல்லியில் கடந்த சில நாட்களாக கோவிட்-19 நோய்த்தொற்றுகள் அதிகரித்து வருவதால், டெல்லியில் கூடுதல் கட்டுப்பாடுகளை விதிப்பது குறித்து கூட்டத்தில் விவாதிக்கப்பட்டது.


இதன்படி டெல்லியில் உள்ள அரசு அலுவலகங்கள் ஊழியர்களுக்கு வீட்டிலிருந்து வேலை செய்ய வேண்டும், தனியார் அலுவலகங்கள் வார இறுதி நாட்களில் 50 சதவீத திறனில் செயல்படும் என அறிவிக்கப்பட்டுள்ளது.

வார இறுதி ஊரடங்கு உத்தரவின் போது அத்தியாவசியமற்ற எந்த செயல்பாடும் அனுமதிக்கப்படாது எனத் தெரிவிக்கப்பட்டுள்ளது.

டெல்லி சுகாதார அமைச்சர் சத்யேந்தர் ஜெயின் கூறுகையில் ‘‘டெல்லியில் கோவிட் -19 அதிகரிப்பதற்கு ஒமைக்ரான் மாறுபாடு காரணமாக இருக்கலாம். மரபணு வரிசைப்படுத்தலுக்கு அனுப்பப்பட்ட 81% மாதிரிகள் பெரிதும் மாற்றப்பட்ட வைரஸின் மாற்றங்கள் இருப்பதை உறுதிப்படுத்தியுள்ளன’’ என்று தெரிவித்தார்.

இதனிடையே பஞ்சாபில் அதிகரித்து வரும் கோவிட்-19 காரணமாக பஞ்சாப் அரசு இரவு ஊரடங்கு உத்தரவை அமல்படுத்தவும், கல்வி நிறுவனங்களை மூடவும், தொற்று பரவுவதைத் தடுக்க திரையரங்குகளை 50 சதவீத திறனுடன் செயல்பட அனுமதிக்கவும் உத்தரவிட்டுள்ளது.

பஞ்சாப் அரசு பிறப்பித்த உத்தரவின்படி, பஞ்சாபின் அனைத்து நகரங்கள் மற்றும் நகரங்களின் முனிசிபல் எல்லைகளுக்குள் இரவு 10 மணி முதல் காலை 5 மணி வரை அனைத்து அத்தியாவசிய நடவடிக்கைகளுக்கும் தனிநபர்களின் நடமாட்டம் தடைசெய்யப்பட்டுள்ளது.

பள்ளிகள், கல்லூரிகள், பல்கலைக்கழகங்கள் மற்றும் பயிற்சி நிறுவனங்கள் உட்பட அனைத்து கல்வி நிறுவனங்களும் மூடப்படுகிறது. பார்கள், திரையரங்குகள், மல்டிபிளக்ஸ்கள், மால்கள், உணவகங்கள், ஸ்பாக்கள், அருங்காட்சியகங்கள் மற்றும் உயிரியல் பூங்காக்கள் அனைத்து ஊழியர்களுக்கும் முழுமையாக தடுப்பூசி போடப்பட்டவர்களுக்கு மட்டுமே அனுமதி வழங்கப்படும்.

மேலும் அதன் திறனில் 50 சதவிகிதம் செயல்பட அனுமதிக்கப்படும்.
அரசு மற்றும் தனியார் அலுவலகங்கள், பணியிடங்கள், தொழிற்சாலைகள், தொழிற்சாலைகள் ஆகியவற்றில் முழுமையாக தடுப்பூசி போடப்பட்ட ஊழியர்கள் மட்டுமே அனுமதிக்கப்படுவார்கள். பஞ்சாபில் ஜனவரி 15 வரை கட்டுப்பாடுகள் அமலில் இருக்கும் என அறிவிக்கப்பட்டுள்ளது.

பஞ்சாப் மாநிலத்தில் கடந்த சில நாட்களாக தொற்று எண்ணிக்கை அதிகரித்து வருகிறது. இது இதுவரை 6,05,922 கோவிட் தொற்றும் 16,651 இறப்புகளும் பதிவாகியுள்ளன.

தவறவிடாதீர்!

Sign up to receive our newsletter in your inbox every day!

 
x