தனியார்-அரசு பங்களிப்புடன் 1,150 ரயில்கள், 100 விமான நிலையங்கள் மேம்படுத்தப்படும்: நிர்மலா சீதாராமன் அறிவிப்பு

2025-ம் ஆண்டுக்குள் நாட்டில் 100-க்கும் மேற்பட்ட விமான நிலையங்கள் மேம்படுத்தப்படும் என்று நிதியமைச்சர் நிர்மலா சீதாராமன் தெரிவித்தார்.

2020-21 ஆம் ஆண்டுக்கான மத்திய பட்ஜெட்டை நிதியமைச்சர் நிர்மலா சீதாராமன் தாக்கல் செய்துள்ளார். உள்கட்டமைப்புக்கான திட்டங்கள் குறித்து நிர்மலா சீதாராமன் பேசுகையில், "உதான் திட்டம் மூலம் 2025-ம் ஆண்டுக்குள் நாட்டில் 100-க்கும் மேற்பட்ட விமான நிலையங்கள் மேம்படுத்தப்பட்டு, தரம் உயர்த்தப்படும்.

2020-21 ஆம் ஆண்டு பட்ஜெட்டில் போக்குவரத்துக் கட்டமைப்புத் திட்டங்களுக்காக மத்திய அரசு ரூ.1.70 லட்சம் கோடியை வழங்க இருக்கிறது.

1,150 ரயில்களை தனியார், அரசு பங்களிப்புடன் இயக்க நடவடிக்கை எடுக்கப்படும். 4 ரயில் நிலையங்கள் தனியார் மூலம் புனரமைப்பு செய்யவும், மேம்படுத்தவும் நடவடிக்கை எடுக்கப்படும்.

புகழ்பெற்ற சுற்றுலாத் தலங்களை இணைக்கும் வகையில் தேஜாஸ் வரை ரயில்கள் இயக்கப்படும். நீண்ட சோலார் மின் உற்பத்தி திட்டங்களை ரயில்வே இருப்புப் பாதை அருகே அமைக்கும் திட்டம் பரிசீலனையில் இ ருக்கிறது.

சிறு, குறு ஏற்றுமதியாளர்களுக்கு காப்பீடு திட்டத்தின் மதிப்பு உயர்த்தப்படும்.

மின்சக்தி மற்றும் புதுப்பிக்கத்தக்க எரிசக்திக்கு ரூ.22 ஆயிரம் கோடி ஒதுக்கீடு செய்யப்படும். பழைமையான மின்மீட்டர்கள் மாற்றப்பட்டு, ஸ்மீர்ட் ப்ரீபெய்ட் மின்மீட்டர்கள் பொருத்தப்படும். ப்ரீபெய்ட் மீட்டர் பொருத்த நுகர்வோர்களுக்கு வாய்ப்பளிக்கப்படும். இந்தத் திட்டம் அடுத்த 3 ஆண்டுகளில் படிப்படியாக நிறைவேற்றப்படும்.

குழாய் மூலம் எரிவாயு கொண்டு செல்லும் திட்டம் 16 ஆயிரம் கி.மீ. இருப்பதை 27 ஆயிரம் கி.மீ. தொலைவுக்கு நீட்டிக்கப்பட்டு, வெளிப்படையான விலை நிர்ணயிக்கப்படும்’’ என்று நிர்மலா சீதாராமன் தெரிவித்தார்.