காஷ்மீரில் மஜக-பாஜக எதிர்காலம் என்னவாகும்?- ஒமர் சந்தேகம்

ஜம்மு-காஷ்மீரில் மஜக(மக்கள் ஜனநாயகக் கட்சி)-பாஜக (பாரதிய ஜனதா கட்சி) கூட்டணி நீடிக்குமா என்ற சந்தேகம் எழுந்துள்ளதாக தேசிய மாநாட்டுக் கட்சித் தலைவரும் காஷ்மீர் முன்னாள் முதல்வருமான ஒமர் அப்துல்லா குறிப்பிட்டுள்ளார்.

ட்விட்டரில் #wondering எனும் ஹேஷ்டேகை உருவாக்கி அதில் தனது கருத்துகளை பதிந்துள்ள ஒமர் காஷ்மீர் அரசியல் நிலவரம் தொடர்பாக பல்வேறு சந்தேகங்களை எழுப்பியுள்ளார்.

"காஷ்மீரில் மஜக-பாஜக கூட்டணியை உடைக்க வேண்டும் என முப்தி முகமது முயற்சிக்கிறாரா? முப்தி-மோடி கூட்டணி தவறான முடிவு என முடிவு செய்துவிட்டாரா? அல்லது முப்தி முகமதும் அவரது மகள் மெஹ்பூபா முப்தியும் சேர்ந்து இயற்றியுள்ள இந்த சர்ச்சை காரணமாக பாஜக தானாகவே கூட்டனியில் இருந்து வெளியேற வேண்டும் என விரும்புகின்றனரா?" என பல்வேறு கேள்விகளை #wondering கீழ் ஒமர் எழுப்பியுள்ளார்.

காஷ்மீர் முதல்வராக முப்தி முகமது சையத் பதவியேற்ற பின்னர் தனது முதல் செய்தியாளர்கள் சந்திப்பிலேயே, பாகிஸ்தானையும், பிரிவினைவாதிகளையும் பாராட்டிப் பேசியிருப்பது பாஜகவினர் மத்தியில் மட்டுமல்லாமல் தேசிய அளவில் கண்டனங்களை பெற்றுள்ளது.