சட்டத்தை மீறும் வீடியோக்களை யூடியூப் இணையதளத்தில் இருந்து நீக்க வேண்டும் என டெல்லி உயர்நீதிமன்றம் உத்தரவிட்டுள்ளது. டாடா ஸ்கை தொடுத்த வழக்கில் டெல்லி உயர்நீதிமன்றம் இந்த தீர்ப்பினை வழங்கியுள்ளது. டாடா ஸ்கை செட் டாப் பாக்ஸினை எப்படி முடக்குவது என்னும் வீடியோ யூடியூப் இணையதளத்தில் இருக்கிறது. அதாவது ஹெச்டி சேனல்களை எப்படி இலவசமாக பார்க்கலாம் என்பது உள்ளிட்ட பல விஷயங்கள் அந்த வீடியோவில் இருந்தது. இதனை அடுத்து டாடா ஸ்கை வழக்கு தொடர்ந்தது.
தகவல் தொடர்புத்துறை விதிமுறைகளின்படி {விதி 3(1) (இ)} யூடியூப் இதுபோன்ற வீடியோக்களை நீக்க வேண்டும் என நிதிபதி எஸ்.முரளிதர் உத்தரவிட்டார். மேலும் யூடியூப் உடனடியாக செயல்பட வேண்டும் என்றும் உத்தரவிட்டார்.
கடந்த வருடம் ஆகஸ்ட் மாதம் 27-ம் தேதி, வீடியோக்களை நீக்க வேண்டும் என இடைக்கால உத்தரவு பிறப்பிக்கப்பட்டது. கடந்த ஆகஸ்ட் 10-ம் தேதி யூடியூப் நிறுவனம், அந்த யூஆர்எல்-யை நீக்கிவிட்டதாக நீதிமன்றத்திடம் தெரிவித்தது.
சர்ச்சைக்குரிய வீடியோவை நீக்கிவிட்டதாலும், எதிர்காலத்தில் இது போன்ற பிரச்சினைகளில் உடனடியாக கவனம் செலுத்துவதாகவும் யூடியூப் நிறுவனம் அறிவித்திருக்கிறது. அதனால் டாடா ஸ்கை தொடுத்த வழக்கை முடித்துவைத்து நீதிமன்றம் உத்தரவிட்டது.