லஞ்சப் புகாரின்பேரில் ஐபிஎஸ் அதிகாரி வீட்டில் சிபிஐ சோதனை: ரூ.7.5 கோடி, நகைகள், சொகுசு கார்கள் சிக்கின

புதுடெல்லி: பஞ்​சாப் டிஐஜி ஹர்​சரண்​சிங் புல்​லர் வீட்​டில் சிபிஐ நடத்​திய சோதனை​யில், ரூ.7.5 கோடி ரொக்​கம், மெர்​சிடஸ் பென்​ஸ், ஆடி கார்​கள் பறி​முதல் செய்​யப்​பட்​டன.

பஞ்​சாப் ஃபதேகர் சாகிப் பகுதியைச் சேர்ந்​த தொழிலதிபர் ஆகாஷ் பட்​டா மீது குற்ற வழக்கு ஒன்று பதி​வாகி​யுள்​ளது. இந்த வழக்கை நீக்​கு​வதற்​காக பஞ்​சாப் ரோபர் சரக டிஐஜி ஹர்​சரண் சிங் புல்​லர் பேரம் பேசியுள்​ளார்.

அவர் கூறியபடி கிருஷ்ணா என்​பவர் ஆகாஷ் பட்​டாவை தொடர்பு கொண்டு பணம் கேட்​டுள்​ளார். இது குறித்து சிபிஐ அலு​வல​கத்​தில் ஆகாஷ் பட்டா புகார் அளித்​தார். இதையடுத்து கிருஷ்ணாவின் போனை சிபிஐ அதி​காரி​கள் இடைமறித்து கேட்​ட​தில், ரூ.8 லட்​சம் பணம் தரவில்​லை, ஆகஸ்ட் மற்​றும் செப்​டம்​பர் மாத மாமூல் பணமும் வழங்​கப்​படவில்லை என கிருஷ்ணா கூறி​யுள்​ளார்.

இதையடுத்து கிருஷ்ணாவை பிடிக்க சிபிஐ அதி​காரி​கள் பொறி வைத்​தனர். அவரை சண்​டிகர் வரச்​சொல்லி ரூ.8 லட்​சம் பணத்தை வழங்​கும்​படி ஆகாஷ் பட்​டா​விடம் சிபிஐ அதி​காரி​கள் கூறினர். கிருஷ்ணா ரூ.8 லட்​சம் பணத்தை பெற்​றவுடன், டிஐஜி ஹர்​சரண் சிங்​குக்கு போன் செய்து ஆகாஷ் பட்​டா​விடம் கொடுத்​துள்​ளார். இரு​வரை​யும் மொஹாலி​யில் உள்ள தனது அலு​வல​கத்​துக்கு வரும்​படி ஹர்​சரண் சிங் கூறி​யுள்​ளார். சிபிஐ அதி​காரி​கள் பின்​தொடர்ந்து சென்று டிஐஜி அலு​வல​கத்​திலேயே ஹர்​சரண் சிங் மற்​றும் கிருஷ்ணாவை கைது செய்​தனர்.

இதையடுத்து, ஹர்​சரண் சிங்​குக்கு சொந்​த​மாக ரோபர், மொஹாலி, சண்​டிகரில் உள்ள வீடு​கள், அலு​வல​கங்​களில் சோதனை நடத்​தப்​பட்​டது. அங்கு ரூ.7.5 கோடி ரொக்​கம், 2.5 கிலோ தங்க நகை, 50 சொத்து ஆவணங்​கள், மெர்​சிடஸ் பென்ஸ், ஆடி கார்​களின் சாவி​கள், 26 விலை உயர்ந்த கைகடி​காரங்​கள், வங்கி லாக்​கர் சாவி​கள், 40 பாட்​டில் வெளி​நாட்டு மது, இரட்டை குழல் துப்​பாக்​கி, பிஸ்​டல், ரிவால்​வர்,
ஏர் கன் பறி​முதல் செய்​யப்​பட்​டன.

கிருஷ்ணா வீட்​டில் நடை​பெற்ற சோதனை​யில் ரூ.21 லட்​சம் ரொக்​கம் பறி​முதல் செய்​யப்​பட்​டது. இதையடுத்து இரு​வரும் நேற்று நீதி​மன்​றத்​தில் ஆஜர்​படுத்​தப்​பட்​டனர். ஹர்​சரண்​சிங் புல்​லர், பஞ்​சாப் முன்​னாள் டிஜிபி எம்​எஸ் புல்​லரின் மகன் என்​பது குறிப்​பிடத்​தக்​கது.