பித்தோர்கர்: உத்தராகண்டில் உள்ள லிபுலேக் கணவாய் வழியாக மேற்கொள்ளப்படும் கைலாஷ் மானசரோவர் யாத்திரைக்கு குமாவோன் மண்டல் விகாஸ் நிகாம் பொறுப்பு வகிக்கிறது.
இதன் தார்ச்சுலா அடிவார முகாம் பொறுப்பாளர் தன் சிங் பிஷ்த் நேற்று கூறியதாவது: தார்ச்சுலா முகாமில் இருந்து 45 பக்தர்களை கொண்ட முதல் குழுவினர் குஞ்சியிலிருந்து 4,104 அடி உயரத்தில் உள்ள நபிதாங்கை செவ்வாய்க்கிழமை அடைந்தனர். அவர்கள் காலநிலைக்கு தங்களைப் பழக்கப்படுத்திக் கொள்ள மறுநாள் முழுவதும் அங்கு தங்கினர்.
அவர்கள் லிபுலேக் கணவாய் வழியாக வியாழக்கிழமை காலை திபெத்திற்குள் நுழைந்தனர். திபெத்தில் தக்லகோட், டார்ச்சென் உள்ளிட்ட பல்வேறு இடங்களில் பக்தர்கள் தங்கி, சிவபெருமானின் இருப்பிடமாக நம்பப்படும் கைலாய மலையையும் மானசரோவர் ஏரியையும் பார்வையிட்டு சுற்றி வருவார்கள். இவர்கள் வரும் 18-ம் தேதி லிபுலேக் கணவாய் வழியாக இந்தியா திரும்புவார்கள். இவ்வாறு அவர் கூறினார்.